Adrift: ’n filmresensie

  • 0

Draaiboek: Aaron en Jordan Kandell
Regie: Baltasar Kormákur
Spelers: Shailene Woodley, Sam Claflin, Grace Palmer, Jeffrey Thomas, Elizabeth Hawthorne

Umberto Eco het die skeepsroer benoem as die grootste uitvinding van die tweede millennium, want daarsonder sou Columbus nie na Amerika kon seil nie. Neem ’n vinnige tydsprong na 1983 en Adrift, gebaseer op die ware verhaal van Tami Oldham en Richard Sharp, wat ’n seiljag van Tahiti na Kalifornië moes stuur en in Hurricane Raymond beland het.

Die film open ná die orkaan bedaar het, met Tami (Shailene Woodley) wat haar bewussyn in die kajuit herwin. Richard (Sam Claflin) het oorboord gespoel en sy kry dit reg om hom te red, maar hy is só erg beseer dat dit op haar neerkom om die seiljag alleen te hanteer en te sorg vir oorlewing die volgende 41 dae.

Dis opvallend hoe goed die draaiboek, gebaseer op Tami se memoires, die storievertelling hanteer. Met ’n bootjie wat weke lank hulpeloos op die oseaan dobber (die wye skote uit die lug is angswekkend!), sou ’n mens ’n flou spanningslyn verwag, maar jou aandag word heeltyd geboei deurdat statiese tonele afgewissel word met naelbyt-aksietonele. Terugflitse van hoe die twee in Tahiti ontmoet en verlief geraak het – sy ’n vrygeestige Amerikaner van 23 en hy ’n 34-jarige alleenvaarder – gee dramatiese diepte aan hul verhouding. Daarby word belangrike inligting terloops ingewerk, sodat die uiteindelike wending die kyker tref as volledig gemotiveer.

Shailene Woodley, bekend om die Divergent-reeks, het duidelik alles ingesit in haar rol (sy is ook een van die vervaardigers), terwyl Sam Claflin (The Hunger Games) sy man staan met ’n puik vertolking.

Adrift word hoog aanbeveel vir sy naatlose vermenging van avontuur, spanning en drama.

Sterre: 4

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top