Adriana Francke help kinders sangdrome bewaarheid

  • 2

Foto van Adriana Francke: Joke Viljoen

Om ’n onderwyseres te wees is ’n roeping. En as jy ’n hart vir kinders het, ken hierdie liefde geen werksure nie. Daarom het ’n groot eer haar te beurt geval toe sy onlangs as een van die Paarl Valcare Proteas of the Valley benoem is vir haar onbaatsugtige liefdadigheidswerk.

Adriana Francke is adjunkskoolhoof by die Laerskool Groenheuwel in die Paarl waar die kinders uit uiteenlopende ras- en kultuurgroepe kom en sy almal oor dieselfde kam skeer. Sy is flambojant en bekend vir haar kleurryke kleredrag. Mense wonder altyd met watter uitrusting sy volgende vorendag gaan kom. Sy is besonder lief vir die uitvoerende kunste en het saam met haar nefie, die sanger Sydwell Beziek, tien jaar gelede die Global Spotlight Talent Search begin wat aan kinders uit ekonomies uitdagende omstandighede en bendegeteisterde woonbuurte die geleentheid bied om hul sangtalent te ontdek. En van hulle het al internasionaal opgetree danksy hierdie blootstelling en geleenthede wat hulle andersins nooit sou gehad het nie.

Adriana help met die stilering en vervoer, vervoer die kinders op haar eie koste heen en weer na opvoerings en het haar huis vir hul repetisies oopgestel. Dikwels moet sy haar sak skud, ten koste van haar eie familie en gesin se behoeftes, maar dit pla haar allermins. "Opofferings hét my soms familietyd gekos, maar my twee kinders en hul gesinne is ook nou al deel van die Global-familie. My gesin se ondersteuning het ook tot my suksesse bygedra en om ’n verskil in ander kinders se lewens te kan maak."

Van waar kom haar liefde vir kinders?

"Ek is die jongste van agt kinders en beide my ouers was onderwysers. My pa was ’n skoolhoof en mens kan maar sê ek is byna letterlik in die skool gebore omdat ons huis langs die skool was. Ek het van kleins af gesien hoe my ouers by die gemeenskap betrokke was en na ander uitgereik het. Van die opofferings wat hulle gemaak het, was soms ten koste van ons, hul eie kinders. Dis hier waar ek geleer het om te gee en ander se behoeftes raak te sien. Dit was ook hier waar my liefde vir die onderwys ontstaan het. Al vier ons susters was in die onderwys.

Dit is egter vir haar hartverskeurend dat hulle weens COVID-19 nie vanjaar se Global Spotlight-kompetisie kan aanbied nie. Sy is ook bekommerd oor haar leerders omdat dit in hul skool se geval baie moeilik is om aanlyn klasse te gee: “Ons klasse is groot en om sosiale afstand te behou is bykans onmoontlik.”

Weens grootskaalse werksverlies en die swak ekonomie is verdere hoofbrekens om genoeg skenkings vir kospakkies vir die kinders te kry.

"Ons sit met die probleem dat almal hul eie mense vrees. Ek is ook deur my dokter aangeraai om van die huis af te werk, omdat ek in ‘n hoërisikogroep val. Dus hou ek my tans besig met administratiewe- en merkwerk.

"Ek weet nie hoe ons hierdie pandemie gaan oorleef nie. Ons hou by die reëls, maar die tydperk waarin ons leef bly onseker."

Daarbenewens is daar ook kommer oor die psigiese en sosiale sy waarmee leerders tydens COVID-19 te make het.

Adriana gesels verder oor haar loopbaan.

"Ek moes tussen drie beroepe kies: onderwys, maatskaplike werk en klere-ontwerp. Nou kan ek al drie uitleef as organiseerder en hoof van die komitee wat ons leerders met leeragterstande se sosio-ekonomiese omstandighede ondersoek en probeer verbeter."

"Ek werk ook saam met plaaslike maatskaplike dienste. Wat modes betref, het ek my eie Adri Styling Diva-blad op Facebook begin. Hier word ek gereeld genader om mense raad te gee oor hoe om hul klere kreatief te stileer en ’n eie styl te volg.

"Ja, ek beskou myself as kreatief, verbeeldingryk, kunssinnig, veelsydig en as iemand wat oor die vermoë beskik om ander te inspireer. Ek streef daarna om ’n goeie kommunikeerder te wees. Om met blydskap en verbeelding te leef en om deur middel van my lighartigheid ander te help om vreugde in sekere situasies raak te sien. Ek hou ook daarvan om ’n skeppende flair te bring na alles wat ek doen."

Adri het nege jaar gelede by Global Spotlight betrokke geraak toe Sydwell haar meegedeel het dat hy met ’n talentkompetisie ’n platform vir jong kunstenaars tussen die ouderdomme van 15 en 25 wou skep.

"Dit was vir my ’n voorreg om deel te kon hê aan Sydwell en ons jong mense se drome. Ons het hierdie kinders op alle gebiede begin ondersteun – van die gebruik van die internet tot hoe om professioneel op te tree. Van grimering tot hoe om aan te trek. Dit het soms maar aanhou en moed hou gekos, maar ek glo as jy werklik hartstogtelik oor iets voel, werk jy hard en glo dat alles moontlik is. Daarom gee ek 100%.

"Ek moes ma, raadgewer en motiveerder wees en altyd positiwiteit uitstraal. Die jonges weet hierdie antie is streng en glo net iets is reg of weg – geen grys gebiede nie. My raad aan hulle is altyd om aan hul Godgegewe potensiaal en talent te glo en om dit op te pas."

Sydwell, wat al verskeie sangkompetisies gewen en op televisie asook oorsee opgetree het, kan die jongmense met persoonlike sangklasse en stemopleiding help.

Van hul wenners en naaswenners het reeds uitgeblink. Onder hulle is Anro Arendse, wat oorsee in Suid-Afrika se jeugkoor optree en die verhoog al met Jimmy Nevis gedeel het; Clarissa Benjamin, wat al op Expresso en saam met Jonathan Butler opgetree het; Deonichia Killowan, wat ’n agtergrondsanger vir die gospelsanger Neville D is; Morné Goedeman, Keenin Von Wielligh, Chelsea Wilson, Didi Davids, wat gereeld in Spanje optree, en Zenobia Jentels, wat al saam met Karin Kortje op die verhoog was.

Foto van Paarl Valcare Proteas of the Valley: Joke Viljoen

Die media, veral radiostasies en tydskrifte, begin ook al meer van hulle bewus te raak en oor hulle te skryf.

Maar terug na haar werk as onnie. Adriana vertel dat dit ’n reuse-uitdaging is om sowel Afrikaans as Xhosa as onderrigtale by haar skool aan te bied. Xhosa-leerders word tot graad 4 in Xhosa onderrig en daarna in Engels.

"Dis elke dag ’n uitdaging om ’n skoolkultuur uit twee kulture te bou. Ek is trots om van so ’n unieke skool met al sy uitdagings deel te wees. As individu het ek baie van die swart kultuur geleer en ek het nou soveel meer begrip vir sekere tradisies en vorme van respek. Daar is soveel wat verskillende rasse van mekaar kan wys raak. By saalbyeenkomste word albei tale gebruik.

"Die werkloosheid onder die leerders se ouers bied vir ons groot uitdagings. Baie van die leerders kom uit agtergeblewe omstandighede en benodig dringend kos, klere en boeke. Ons maak baie staat op niewinsgewende organisasies en skenkings uit die gemeenskap. Hiervoor is ons baie dankbaar.

"Ons is boonop ’n skool wat hoofsaaklik deur die staat befonds word en ouers nie eens die minimum skoolfonds kan betaal nie, en daarom moet ons gereeld funksies aanbied om fondse in te samel. Die meeste kinders kom uit armoedige enkelouergesinne waar grootouers die ouers se rol moet vervul. Die ouers is dikwels dwelmslawe, raak by misdaad betrokke of is self te jonk om ouers te wees. Baie ouers is ongeletterd en kan nie die leerders met tuiswerk help nie. As hulle werk, kom hulle laat en doodmoeg tuis. Daar is huishoudings waar kinders die hoof van die huis is.

"Om hierdie rede kon ons ’n nasorgsentrum begin wat geborg word deur Hilltop Legacy, ’n niewinsgewende maatskappy waarvoor ons ook skenkings nodig het.

"Ons behoort reeds aan ’n staatsvoedingskema waardeur leerders wat tuis nie kos kry nie, twee maaltye per dag by die skool kry.

"Kinders word reeds vanaf agtjarige ouderdom beïnvloed om by bendebedrywighede betrokke te raak. Die jonges word misbruik om huise en skole in die gemeenskap te beroof. Van ons leerders was al self slagoffers van geweld en moes in die hospitaal opgeneem word. Ons ervaar ook die misbruik van dwelms onder ons leerders.

"Ja, baie van hierdie leerders kom uit haglike omstandighede. Hul grootste behoefte is aandag, omgee, liefde en dissipline.

"Dit was beslis vir my ’n groot eer om erkenning van die Valcare Foundation te kry vir my werk en die verskil wat ek in my gemeenskap probeer maak. Dit was selfs ’n groter eer as om enige onderwystoekenning te kry. Ek is bly dat erkenning gegee word aan mense, veral vroue, wat gemeenskapsdiens verrig en ander se lewens positief probeer verander.

"As jy die blom van die protea se groeiproses ondersoek, sal jy weet wat hierdie toekenning vir my beteken. Dit het my ook laat besef dat om vereer te word vir die feit dat jy gee en ’n verskil wil maak sonder om iets terug te verwag, hierdie toekenning meer werd maak as enige geld."

Wat is hierdie toegewyde vrou se raad vir ander wat in haar voetspore wil volg?

"Mens moet as onderwyser en opvoeder van jong kinders nooit aan jouself twyfel nie. Jy moet jouself as belangrik beskou. Iemand met ’n lewensdoel."

Adri wil die gemeenskap uitdaag om ’n verskil te maak.

"Ons vrywilligers, Joshua Meyer, Maggie Daniels en Angel Francke, ontvang nie ’n sent nie. Hulle is ook op die bestuurspan van ons niewinsgewende onderneming Soulo Productions – die vaandel waaronder die talentkompetisies plaasvind. Hulle is tops. Sonder hulle kan ons nie. 

En haar toekomsdrome?

"Ek glo, droom en hoop dat net soveel geld bewillig word vir die kunste as vir sport sodat kinders dans- of sangklasse kan bekostig. Die kunste is deel van ons menswees. Daar is baie kinders wat nie noodwendig sportief is nie, maar ander talente het wat ontwikkel moet word. As mens as kunstenaar nie jou kreatiwiteit kan uitleef nie, verloor jy ‘n stukkie van jou siel."

Meer inligting by e-posadres: soulopro6@gmail.com

  • 2

Kommentaar

  • Adriana is 'n besonderse nederige persoon. Ek her die geleentheid gehad om met haar te werk. Haar uitnemende gesindheid spreek boekdele en is altyd behulpsaam waar sy kan. Sy is daardie Godgeskape protea werd.
    Alle sukses bid ek haar toe.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top