WAT: Vyf nuwe aanstellings en ’n handelsnaamkompetisie

  • 0

Vyf nuwe aanstellings 

As deel van die tienjaarplan vir die voltooiing van die WAT is vyf nuwe redaksielede in Julie as mederedakteurs aangestel. Hulle was voorheen in die kommersiële en akademiese omgewing werksaam en beskik oor aansienlike vaardighede en ervaring in die leksikografie. Die nuwe personeellede is:

Dané Claassen (27): PhD-student in die Leksikografie; Charléne de Kock (39): voorheen Senior Leksikograaf, Pharos Woordeboeke, Kaapstad; André du Plessis (28): voorheen Leksikograaf, Pharos Woordeboeke, Kaapstad; Fred Pheiffer (57): voorheen Leksikograaf, Oxford University Press South Africa; Esmaré van der Merwe (53): voorheen dosent in die Departement Kurrikulumstudies, Fakulteit Opvoedkunde van die US.

Hulle word tans opgelei in die WAT se doelgeboude woordeboekskryfprogram (Tlex), die redaksionele stelsel van die WAT en die leksikografiese prosesse wat daarmee saamhang.

Hierbenewens is Alet Cloete, voorheen mederedakteur by die WAT, bevorder tot senior mederedakteur. 

Agter: Dané Claassen, Esmaré van der Merwe en Charléne de Kock; voor: André du Plessis en Fred Pheiffer

Handelsnaamkompetisie

Inskrywings vir die WAT se kompetisie vir die treffendste Afrikaanse handelsnaam sluit op 10 Augustus. Eienaars van ondernemings met Afrikaanse name word versoek om in te skryf: borg jou onderneming se naam vir R100 of koop dit vir R5 000 en laat weet ons dat jy die naam inskryf vir die kompetisie. Jy kwalifiseer natuurlik outomaties vir Sanlam se jaarlikse R25 000-prystrekking in April, jy ontvang ’n sertifikaat en kry gratis toegang tot die Aanlyn WAT. As jy weet van ’n treffende Afrikaanse handelsnaam in jou omgewing, vra hulle om in te skryf, of stuur die naam vir ons sodat ons hulle kan nader. Die volgende inskrywings is reeds ontvang:

  • Babylonstoren (landgoed, Franschhoek)
  • Bemind (wynmakery in McGregor)
  • Boeremeisiebeeldskoon (skoonheidsprodukte)
  • Folio (taaldiens)
  • Gister (oudhedewinkel, Somerset-Wes)
  • Groot Plaasproe (voedselfees, Sandringham)
  • Juksta (juweliersware )
  • Knus Karoo Kombuis (restaurant, Paarl)
  • Nisboere (televisieprogram)
  • Platsak (vulstasie en winkel, Witrivier)
  • Respek en eiers (restaurant, Pretoria)
  • Rojaal (restaurant, Elgin)
  • Skryfyster (taaldiens)
  • Skep (argitekte, Stellenbosch)
  • Tamatiestraat (spyseniering en kookklasse)
  • Toerboer (toeroperateurs)
  • Twaalf (restaurant, Stellenbosch)
  • Hoendertande, Knapsekêrel, Treffer, Heimwee, Eekhoring, Kreatuur (wynname van De Kleine Wijn Koöp)
  • Bloos, Kaalvoet, Swartskaap, Skoonma, Kleinboet, Posmeester, Houtbeen (wynname van Hermanuspieterfontein Wingerde).
  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top