WAT-kompetisie: Het jou onderneming die treffendste Afrikaanse handelsnaam?

  • 1

Die Woordeboek van die Afrikaanse Taal het ’n kompetisie geloods vir die treffendste Afrikaanse handelsnaam.  Die enigste voorwaarde is dat die naam vir R100 geborg of vir R5 000 gekoop moet word in die WAT se Borg ’n Woord-projek.  Die wenner sal by ’n Woordpret-geleentheid van die WAT aangekondig word en die wenner sal ook ’n spesiaal ontwerpte sertifikaat van die WAT ontvang.  Ander vroeë inskrywings is SKEP, ’n argiteksfirma in Stellenbosch, Respek en Eiers, ’n koffiewinkel in Pretoria en Platsak, ’n vulstasie en winkel in Witrivier.  Besoek  www.wat.co.za om deel te neem aan Borg ’n Woord en bel 021 8873113 of stuur ’n e-pos aan wat@sun.ac.za om in te skryf vir die handelsnaamkompetisie. Die sluitingsdatum is 31 Julie.  

Een van die eerste inskrywings is Knus Karoo Kombuis, die naam van die restaurant in Pieter Hugostraat in die Paarl. Hier verskyn Albert Chirwa, Robin Jacobs en Nicolene Diedericks (mede-eienaar) saam met Willem Botha, uitvoerende direkteur van die WAT. 

Willem Botha gesels met Naomi Meyer oor die kompetisie.

Willem, die WAT is op soek na die treffendste Afrikaanse handelsnaam. Watter ondernemings kan inskryf? En wat van koshandelsname?

Die kompetisie is oop vir alle Afrikaanse handelsname, alhoewel dit tot dusver kleiner ondernemings is wat deelneem. 

Is julle op soek na woorde wat slegs in Afrikaans gebruik kan word? Ek sien die woord SKEP is ingeskryf deur ’n argitektuurfirma in Stellenbosch en dit voel nie vir my of dit in ander tale gebruik kan word nie. Maar wat van woorde soos water, of impala, of indaba, of enigiets anders wat dubbelsinnig is of in verskillende tale gebruik kan word?

Ons het geen vooropgestelde idees oor hoe die treffendste Afrikaanse naam moet lyk, of met watter soort Afrikaanse naam jy die meeste anderstaliges sal bereik nie. Dit gaan bloot oor die treffendste Afrikaanse naam ten opsigte van die wyse waarop die produk in die naam vergestalt word.

Is julle op soek na een wenner, of sal daar ’n kortlys wees van name wat julle aandag getrek het?

Ons sal die publiek op ons sosialemediaplatforms vir al die inskrywings laat stem en op grond van die getal stemme wat die name kry, kan ons dalk besluit om bv die beste drie name as wenners aan te kondig.

Wat is die doel van die kompetisie?

Die doel van die kompetisie is om mense bewus te maak van die skeppende krag van Afrikaans en dat jy suksesvol met ’n Afrikaanse naam kan handel dryf.

Is daar nog ruimte in Suid-Afrika vir ’n besigheid wat slegs ’n Afrikaanse naam het?

Ons het daardie vraag reeds aan van die deelnemers gevra en ons nooi jou uit om dieselfde te doen. Die antwoord is ’n besliste ja. Ilse Schutte van McGregor se wynmakery heet Bemind en volgens haar is dit veral Engelssprekende klante wat die grootste waardering vir die naam het. Hulle snap dikwels die verband met beminde, terwyl Afrikaanssprekendes dink dit is ’n Engelse naam en dit as Bemaaind uitspreek omdat hulle gekondisioneer is om te dink dat ’n handelsnaam Engels moet wees.  Afrikaanse name het beslis ook ’n toeristiese waarde en toeriste hou van die uniekheid van Afrikaanse name — die bekoring van die onbekende. Om dieselfde rede word groot sukses ook met Nederlandse name in Suid-Afrika behaal. Ook Suid-Afrikaners hou van name wat iets van die onbekende in hulle dra.  In hierdie geval is onbekend beslis nie onbemind nie!

  • 1

Kommentaar

  • Johnnes Comestor

    Die Franse bemark hulle wyne met Franse name. Buitelanders het al hulle verbasing uitgespreek dat Afrikaanssprekende produsente meesal Engelse name vir hulle wyne gebruik. Afrikaanse sake-ondernemings het dikwels Engelse name. Sedert 1994 het Afrikaans grootliks van kruideniersware, bv blikkieskos, verdwyn.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top