Uittreksel: Dit proe soos huis deur Herman Lensing

  • 2

LitNet publiseer uittreksels uit boeke wat pas verskyn het. Lees ’n gedeelte uit die resepteboek Dit proe soos huis deur Herman Lensing.

Titel: Dit proe soos huis
Skrywer: Herman Lensing

Uitgewer: Human & Rousseau
ISBN: 9780798179911

Kerriefrikkadelle 

Frikkadelle

  • 1 sny witbrood
  • 100 ml melk
  • 500 g maer maalvleis (ek verkies lam)
  • 1 groot tamatie, geskil en grofgerasper
  • 2 takkies tiemie, fyngekap
  • sout en varsgemaalde swartpeper

Sous

  • 2 uie, grofgerasper
  • 250 ml warm water
  • 15 ml sterk kerriepoeier
  • 30 ml suiker
  • 15 ml mielieblom
  • ’n knippie sout
  • 5 ml borrie
  • 60 ml witwynasyn
  • 15 ml appelkooskonfyt

Frikkadelle

Verhit die oond tot 180 ºC. Week die brood in die melk. Sit die maalvleis, tamatie en tiemie in ’n groot mengbak en voeg die geweekte brood by. Geur met sout en peper en meng goed. Vorm die maalvleis in klein happiegroot balletjies van ongeveer 20 g elk en pak dit in ’n oondpan. Voeg ’n klein bietjie kookwater by en bak in ’n warm oond (nie te droog nie, ongeveer 10 minute). Haal uit en hou eenkant.

Sous

Meng al die bestanddele vir die sous goed in ’n groot pot totdat die mielieblom opgelos het. Bring tot kookpunt en kook vir 5 minute of tot ’n lang sous vorm. Giet oor die gaar frikkadelle en maak seker alles is mooi bedek. Maak die bak toe en laat staan in die yskas vir 2-3 dae sodat die geure kan ontwikkel. Sit voor.

My ma het hierdie frikkadelle vir byna elke geleentheid op die dorp gemaak. Sy het selfs ’n spesiale bak gehad waarin hulle in die yskas gestaan het; dit was geel gevlek van die kerriesous. Een van my herinneringe aan dié frikkadelle is bitter-soet. My ma het vir ’n funksie gekook. Die dienborde was gepak met die kos, gereed om weg te neem. Eers het ek net een frikkadel van die bord af gesteel; toe’s ek terug vir nog een en toe weer vir nog ’n paar. Ek het my oortreding probeer verdoesel deur die happies rond te skuif op die bord, maar my ma se perfeksionis-oog het dit nie misgekyk nie ... As ek my oë toeknyp brand my boude nou nog, maar ek proe steeds die frikkadelle ook!

  • 2

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top