Toyota US Woordfees 2020 Instagram-resensie: Kraai

  • 0
 

Seksualiteit is op die beste van tye ’n kontroversiële issue en Kinsey se glyskaal is maar één verduideliking van die kompleksiteit van aantrekkingskrag. As jy reken dié saak is bloot swart of wit, woon jy onder ’n klip en het jy waarskynlik ook berading vir etlike ander dinge nodig. Kraai, geskryf deur Mike Bartlett en vertaal deur Wessel Pretorius, ondersoek presies hoe glibberig die glyskaal dan nou is. Dit vra ook daai ongemaklike vraag: Kan jy jou seksualiteit kies? As jy vir 7 jaar lank in ’n verhouding met ’n man was (en voor dit nog nooit met wellus na ’n vrou gestaar het nie), kan jy skielik van plan verander?

Johan, vertolk deur Wynand Kotze, is onseker oor sy verhouding. Hy slaap saam met ’n vrou en dit ontaard in ’n verhouding. Wat volg is ’n toutrekkery tussen Johan, sy partner en sy skelmpie. En jy weet, iewers gaan Johan moet kies — is hy heimlik straight, hunkerend na ’n gewone lewe met kinders om ’n kerstafel of is die lewe wat hy tot op hede gelei het, die ware weergawe van homself?

Die nuwe gier in plaaslike teater is om die kykers rondom die speelspasie te laat sit, soos toeskouers om ’n bokskryt. Dis ’n wonderlike manier om die kyker intiem te betrek. Met Kraai is dit geen uitsondering nie. Nicole Holm het ’n bedrewe regisseurshand en Ilana Cilliers se choreografie gee ’n interessante edge aan die vertelling van dié dikwels komiese verhaal. Wian Taljard is heerlik om na te kyk en Karli Heine en Stian Bam gee solid performances, soos mens van hulle verwag. Die spil waarom als egter draai is Johan, maar dis ongelukkig ’n redelike wankelrige wiel. Die karakter se besluiteloosheid dryf mens tot raserny en frustreer die kyker mateloos. Iemand in die gehoor het op ’n stadium kliphard gemompel: "Skiet hom net!" Mens sukkel om te begryp hoe twee sterk, aantreklike karakters (Taljard en Heine) hulle koppe verloor oor die vaal en vervelige Johan. Selfs Kotze se vertolking is futloos in vergelyking. Wanneer Johan na baie drama uiteindelik ’n besluit neem, laat ook dít mens ongemaklik en onvergenoegd. Kraai is standaard-feesmateriaal. Dit vra baie vrae, maar moenie al die regte antwoorde verwag nie.
#instagramresensie #kraai (📷✏@nakadien

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top