Toyota US Woordfees 2020 Instagram-resensie: Johnny Boskak voel ’n bietjie ...

  • 0

'n Kaalkopman, volledig in denim geklee, staan met ’n army balsak oor die skouer en ryloop. Hy loop en rook en rook en loop. Die oorlog is verby en nou moet Johnny Boskak weer die regte wêreld vierkantig in die oë gaan staar. Op pad na wie-weet-wat, loop Johnny hom vas in verskeie gure karakters en die ewe sluwe Eve, wat uiteraard onmiddellik sy hart steel. Eve is aan die hardloop van haar kêrel, en saam-saam vlug Johnny en Eve voor die bose boyfriend in sy monster bakkie uit. Is die man in die trok bloot ’n verontregde kêrel of is dit eintlik die duiwel wat vir Johnny jaag? Johnny Boskak voel ’n bietjie ... is Barry Strydom se vertaling van Greig Coetzee se Johnny Boskak is feeling funny wat bykans 20 jaar gelede reeds gedebuteer het. Die bosoorlog en die emosionele skade wat dit aan ’n hele generasie mans aangerig het, is nooit ou nuus nie. Dié gegewe is ryke stof vir boeke, dramas en films en die verloopte soldate is ewige tydbomme wat wag om te ontplof. Johnny is nie die uitsondering op die reël nie. Die vraag is net, wanneer gaan daai bom ontplof?

Craig Morris, wat die rol van Johnny vertolk, lewer ’n vertolking van ’n leeftyd. Hy slaan jou asem weg met ’n fisieke energie en choreografie wat lyk na ’n dans. Die storie word vertel in rymformaat (so bykans ’n rap), en die woorde word afgevuur soos ’n sarsie skote uit die AK47 wat Johnny saamdra. Morris het onder die befaamde Andrew Buckland studeer en die mimiektradisie slaan sterk deur in sy uitbeelding van ’n handvol uiteenlopende karakters in dodgy kroeë en vuil hotelle.


Hierdie is ’n moet-sien. Morris het nie verniet in 2019 die Kanna vir beste akteur gewen nie.

#johnnyboskak
@craigmime @woordfees #instagramresensie (✏📷 Nadine Petrick @nakadien )

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top