Toyota US Woordfees 2020 Instagram-resensie: Die voordele van eierwit

  • 0
 

Retief Scholtz is ’n mens-mens. Dié verloopte boertjie, wat nou voltyds skryf, verstaan die human condition baie goed en met Die voordele van eierwit wys hy weer hoekom akteurs toustaan om in sy toneelstukke te speel. Margit Meyer-Rödenbeck en Marion Holm span na etlike jare weer kragte saam en die energie tussen hulle is elektries. Hulle vertolk die rolle van Ans en Elna, twee susters, absoluut moeiteloos. Die stuk speel ook al vir langer as ’n jaar en die gemak waarmee die twee met mekaar en met die stel omgaan, is “onsettend” (inside joke) gerusstellend. Die gehoor eet behoorlik uit hulle hande.

Die premis is heel eenvoudig. Ans (’n bekwame Afrikaans-onderwyser met groen vingers en ’n stukkie raad vir elke kwaal) en Elna (’n eiendomsagent, met ’n tweeling en ’n dokter vir ’n man) pak hulle pa se woonstel op, want dié moet na ’n beenamputasie in ’n versorgingseenheid gaan bly. Hulle klim in die hysbak, volgelaai met als van ’n gemakstoel tot ’n opgemaakte kersboom, en dan breek die ding op vloer vier. In die tyd wat dit vat om die herstelwerk te doen, leer Ans en Elna mekaar van voor af ken. ’n Interessante boek en ’n boks gemerk “Privaat” is die katalisator van ’n lang overdue gesprek. Ou koeie word uit slote gegrawe, aannames word gemaak en weerlê en splinternuwe geheime word met deernis gedeel. Mens dink jy ken jou familie, maar dit vat ’n uur in ’n gebreekte hysbank om te besef hoe min julle eintlik van mekaar weet.

Hierdie stuk is ’n feestreffer en die kaartjies verkoop soos soetkoek. Jy lag jouself silly, net om 'n minuut of wat later ook ’n ou traantjie of twee te pink. Dis héérlike, onpretensieuse teater.

#woordfees2020 #instagramresensie
#voordelevaneierwit
@retiefscholtzproduksies @retief.s
@margitmeyerrodenbeck
@marionholmactress (📷✏ Nadine Petrick @nakadien)

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top