Tien vrae: André Fourie oor Monochroom reënboog

  • 10

monochroomreenboog650

Skrywers oor hul nuwe boeke: André Fourie oor Monochroom reënboog

  1. Waarom het jy Monochroom reënboog geskryf – en was daar een idee/emosie waaruit die boek ontspring het, of kan jy verskillende faktore as inspirasie noem?

Ons woon tans in Engeland en eendag het die verlange na Suid-Afrika en my mense die oorhand gekry. Ek het sommer begin skryf aan ‘n storie uit my kinderjare in Bloemfontein en toe ek weer sien, het ‘n boek begin vorm aanneem.

  1. Die titel roep kleurvolle en ook teenstrydige aspekte op: vertel asseblief iets hiervan.

Suid-Afrika staan as die reënboognasie bekend, maar ons weet almal dat daar ‘n tyd was (en selfs vandag nog is) toe die reënboog nie so kleurvol was nie en hoofsaaklik maar in skakerings van swart en wit was. Dit titel verwys ook na ‘n blaai deur ‘n album vol monochroom foto’s van onthoutye en wonderlike (maar ook nie-so-wonderlike-nie), kleurvolle dae.

  1. Waaroor handel die storie?

Dit is die verhaal van Abrie, ‘n seun wat grootword gedurende die 1960’s en 1970’s in Bloemfontein. Die storie strek oor tien jaar en vertel van Abrie se lief en leed, sy verhoudings met mense van verskillende kultuurgroepe, sy bewuswording van apartheid en sy twyfel in die standpunt wat hy ten opsigte van die kwessie moet inneem. Abrie se tienerhormone skop ook in met gepaardgaande eerste liefde (en later ernstiger romanse). Die laaste gedeelte van die boek handel oor sy diensplig, belewenisse op die grens en die impak wat dit op sy lewe gehad het.

  1. Wat was die moeilikste aspek van die skryfproses van hierdie boek, en hoekom?

Ek het die boek aanvanklik in die eerste persoon geskryf, maar toe klink dit vir my te veel na ‘n outobiografie – iets wat ek nie wou geskryf het nie. Om mense te beskerm is name verander en konteks is soms vir dramatiese effek of ander redes aangepas. Ek het besef dat daar baie Abries in Suid-Afrika is en hierdie storie is hulle storie. Ek het toe die hele storie in die derde persoon oorgeskryf. Dit was dus vir my moeilik om die storie nie soos ‘n outobiografie te laat klink nie, selfs al is dit meestal my eie ervarings. Verder moes ek daarteen waak om die storie nie ‘n politieke geur te gee nie – dit was vir my krities belangrik. Die storie word vertel soos dit beleef is, sonder enige kommentaar.

monochroom_andrefourie

André Fourie

  1. Het jy op enige plek in die manuskrip ‘n dooie punt bereik en indien wel, wat het veroorsaak dat jy dit kon oorkom?

Toe ek aan die weermaggedeeltes begin werk het, veral die belewenisse op die grens, het ek toegeslaan. Baie van ons manne het werklik traumatiese belewenisse tydens die bosoorlog gehad en heelwat van my geslag is nog van die ou garde wat sulke ervarings nie op die mou dra nie – dit word diep weggepak. En skielik is ek toe in ‘n situasie waar ek moet diep delf om hierdie herinneringe uit te grawe. Een hoofstuk het my werklik drie maande geneem om te voltooi.

  1. Wat was vir jou die belangrikste: plot, karakter, ruimte, atmosfeer of tema?

O, beslis atmosfeer. Dit was vir my baie belangrik dat die leser op bladsy 1 na die 1960’s teruggevoer word en dan eers wanneer die boek neergesit word, weer daar uitklim. Dit is waarom ek sekere woorde gebruik wat vandag dalk in onbruik verval het. Ek het vir ‘n groep moderne tieners gevra of hulle weet wat “groovy” beteken. Hulle het my vraend aangekyk totdat een meisie vra: “Oom, is dit nie amper soos ‘cool’ nie?” Verder gebruik ek hier en daar ‘n woord wat vandag polities nie korrek is nie, maar wat vir my van kardinale belang was binne die konteks waarin dit gebruik is. Ek wou die atmosfeer so realisties as moontlik hou.

  1. Het jy, nadat die manuskrip voltooi is, dit vir ander mense gewys voor dit gepubliseer is?

Dit is my eerste vollengte-roman (my vorige werke was ‘n motiveringsboek en tydskrifverhale) en ‘n ou twyfel maar of dit gaan werk of nie. Ek het die manuskrip dus vir twee skrywervriende gestuur en nadat hulle die groen lig gegee het, het ek dit ook aan geselekteerde persone gestuur vir kommentaar – kommentaar wat ek toe kon gebruik om die boek te bemark.

  1. Skrywers het nie ‘n pensioen nie, boeke maak meestal nie ryk nie. Waarom skryf jy?

Vir my is dit ‘n ernstige stokperdjie en ontvlugting. Dit is vir my heerlik om in ‘n nuutgeskepte karakter te klim.

  1. Werk jy reeds weer aan ‘n volgende manuskrip?

Ek het twee idees en werk tans aan die een, ‘n meer filosofiese werk wat vrae vra oor rykdom/armoede, selfvergenoegdheid/ambisie en geluk. Die ander een is ‘n bundel kortverhale in die trant van Koöperasiestories.

  1. Wie is jou skryfhelde (plaaslik en Afrikaans, maar ook internasionaal)?

As kind het ek PJ Schoeman se boeke verslind. Ek hou van stories – boeke en rolprente – wat ‘n greep uit die alledaagse lewe gee, hetsy die verlede of die moderne tyd. Om daardie rede hou ek van PG du Plessis, Dana Snyman en Daleen Matthee se werk. Internasionaal is daar so ‘n groot verskeidenheid dat ek nie een spesifieke skrywer kan uitsonder nie – miskien Frank McCourt. Ek gaan deur fases en tans lees ek graag werke soos dié van Nietzsche, Trotsky en Viktor Frankl.

____________________________

Internasionaal beskikbaar as e-boek en slapband by Amazon, Smashwords en Createspace

Suid-Afrika: Doen navraag by enige boekhandel en vra dat die boek bestel word as dit nie in voorraad is nie. Tans beskikbaar by Protea en Exclusive Books. Ook as e-boek beskikbaar by Leserskring, Kwarts Uitgewers en (binnekort) by On the Dot en Takealot.

Kontak Desiré Hurst as jy nie regkom nie. Sy kan die boek pos (R200 insluitend posgeld). Sel: 082 871 8028. Tel: (012) 345-5541. E-pos: mikedes@mweb.co.za. Of kontak die skrywer: fourieaj@hotmail.com.

 

 

  • 10

Kommentaar

  • Een boek wat ek sonder twyfel sal aanbeveel. Veral die mense wat die tyd van die bosoorlog intens belewe het, kan dalk uitvind hoe naby hierdie verhaal aan hul eie belewenisse is.

  • Alice Hendriks-Boshoff

    Monochroom Reënboog is 'n boeiende boek. Die taalgebruik en skryftrant pas treffend aan by die verskillende lewensfases van Abrie, die hoofkarakter. Fourie skilder omgewing, omstandighede en situasies só helder en lewensgetrou, dat 'n mens sterk daarmee kan identifiseer - veral as jy self 'n oud-Bloemfonteiner is. Hierdie boek leen hom mi nie tot 'n opvolg van enige aard nie, maar ook ander skeppingswerk van Fourie sal 'n aanwins wees vir die Afrikaanse boekrak. Ons sien uit daarna.

  • Dr G M Augustyn

    Ons wat bevoorreg is om Andre in persoonlike verskyning te ken, hier in Engeland, weet dat die man sy woorde weeg en kies, en dat hy versigtig omgaan met mense omdat hy broosheid diep ken. Sy verhaalkuns in Monochroom Reënboog bring lekkerte in vele opsigte, want ook daar is ontwerp en fyn kies van woord en gedagte volop vir die genietleser en die ontledingsleser. Knap gedaan, Andre!

  • As 'n seun van 'n soldaat wat self in die 70's groot geword het was dit 'n ongelooflike grypende boek. Ek kon myself inleef in heelwat van die situasies. Ek bly ook nou in Engeland en die boek het erg aan my hartsnare getrek. Soos die Engelse sê: André you did good.

  • Annette le Grange

    'n Moet lees boek. Skitterende skryfstyl, eerlik, openhartig. Die storie tref mens fel,veral vir ons wat in daardie era groot geraak het. Die boek lewer 'n intense genot en mens is half jammer daar is nie nog hoofstukke oor nie, veral as jy lees en besef dit is die laaste bladsy. Baie geluk mnr Fourie, jou boek is beslis aan te beveel vir jonk en oud. Stukkie ware geskiedenis van ons brose land en sy mense.

  • Ek was weer teruggevoer na my kinderdae op 'n wyse wat my 'n knop in die keel gegee het. André jou eerlike, gemaklike skryfstyl gee geloofwaardigheid aan jou boek. Wel gedaan my vriend. Ek kan nie wag vir die opvolg nie.

  • Ek ken vir Andre reeds baie jare. Ons was huisvriende toe hulle in PTA gewoon het. Toe ek die boek lees het my eie lewe en grootwordwêreld voor my afgespeel. Ek is deeglik herinner van die ou dae. Die boek is briljant geskryf ... vol hartseer, verlange, nostalgie, vreugde en letterkunde met 'n sterk geskiedkundige inslag.
    Ek het dit geniet ... dankie Andre Boetie (Wat ek hom noem). Maak weer so!

  • Colleen Potgieter

    Ek het so pas 'n boek klaar gelees ... dit was fantasties ... kry dit, koop dit of leen di, maar lees dit.
    Monochroom Reënboog geskryf deur André Fourie.

  • Herman du Plessis

    Baie geluk met ‘n uitstekende boek. Ek het elke bladsy geniet, en lekker gelag, gehuil, en opgewonde geraak saam met jou karakters. Dit het my soveel nostalgiese genot verskaf om te lees van ons herkoms in hierdie monochroom reënboogland. Ek lees al Jeffrey Archer, Sidney Sheldon, Stigg Larson, Jo Nesbo, Deon Meyer en Wilbur Smith se boeke, en kan nou die naam van Andre Fourie daarby voeg.

    Welgedaan ou maat, en mag daar nog baie uit jou pen vloei. Jy mag maar!

  • Johan Noordman

    Nooit so geboei deur 'n boek nie - wens dit het nog 20 addisionele hoofstukke gehad. Kan nie wag vir 'n volgende treffer nie.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top