Persvrystelling: Spelkampioene maak gereed vir die eindronde van die nasionale Sanlam WOW Spelfees

  • 0

Meer as 300 leerders van 129 skole dwarsoor Suid-Afrika het gekwalifiseer vir die eindronde van die Sanlam WOW Spelfees 2018, wat op 20 Oktober by die Universiteit Stellenbosch plaasvind. Dit beteken ’n klomp skoenlappers fladder reeds in baie leerders (en hulle ma’s en pa’s en onderwysers) se mae, want die eindstryd van die Spelfees is ’n opwindende toeskouersport.

“Dit is die hoogtepunt van ’n jaar se harde werk,” sê Saartjie Botha, direkteur van die Woordfees en WOW-projek. (WOW is ’n akroniem vir Woorde Open Wêrelde.) “Ons doel met die kompetisie is om leerders weer opgewonde te maak oor hul taal – en oor woorde. By WOW en by die Woordfees draai alles wat ons doen om woorde – lees, skryf, sang, toneel. Ons wil graag dié passie ook by ’n nuwe geslag laat vlamvat.”

Frank Louw, Sanlam se bestuurder van sosio-ekonomiese ontwikkeling, sê hulle is trots om die borg van die Sanlam WOW Spelfees te wees: “Spel speel ’n groot rol in leerders se akademiese prestasie op skool, asook in die ontwikkeling van leerders se potensiaal om uiteindelik naskoolse opleiding te ondergaan, finansieel vooruit te kan gaan en waardige, suksesvolle landsburgers te word. Dit is vir leerders van uiterste belang om hul taal so korrek moontlik te verstaan, praat en skryf. Die Spelfees is juis hierop gemik – om spel, wat soms uitdagend mag wees, in ’n leerryke ervaring te omskep.”

Fiona van Kerwel, die WOW- projekbestuurder, is dit met Louw eens: “Goeie spelling verbeter jou punte op skool en met goeie punte kan jy uiteindelik ’n Matie word. Deelnemers se selfvertroue verbeter daarmee saam en hul selfbeeld word versterk deurdat hulle leer om voor ’n hele gehoor ’n woord te spel.”

Van Kerwel en haar span deurkruis jaarliks die land om te sorg dat die verskillende rondes van die kompetisie – van skoolvlak, dan na kring-, distriks- en provinsiale vlak – foutloos en glad verloop. “Ons maak staat op ’n hele klomp onderwysers en ouers wat ons vrywillig help om die projek verder uit te bou. Die potensiaal van ons leerders én hulle ouers en onderwysers is ongelooflik en gee ’n mens oneindig baie hoop,” sê sy.

Leslie van Rooi, Senior Direkteur: Sosiale Impak en Transformasie aan die Universiteit Stellenbosch, bestempel die WOW Nasionale Spelfees as een van sy “jaarlikse hoogtepunte”, onder meer, omdat dit help om brûe te bou: “Suid-Afrikaners van verskillende agtergronde kom saam om mekaar te leer ken en om – ten minste vir ’n oomblik – as gelykes mee te ding in ’n kompetisie wat ons wys wat hierdie geslag Suid-Afrikaners kan doen. En skielik is daar splinternuwe moontlikhede vir ons land.”

WOW ondersteun meertaligheid en vanjaar neem 112 leerders uit vier provinsies deel aan die Sanlam WOW Nasionale Spelfees vir Engels Eerste Addisionele Taal. Sedert 2017 bied WOW ook ’n Xhosa-spelfees in vier distrikte aan en die plan is om hierdie aanbod verder uit te brei.

Die nasionale eindronde van die Sanlam WOW Spelfees word op Saterdag 20 Oktober by die Universiteit Stellenbosch aangebied en die kompetisie begin om 10:00. Die prysuitdeling sal om 15:00 in die HB Thom Teater (binnekort die Adam Small Teater) plaasvind. Sien asseblief die volledige program onder.

Om die geleentheid by te woon of vir meer inligting oor die Sanlam WOW Spelfees, kontak vir Danie Marais by die Woordfees-kantoor by danie_marais@sun.ac.za of 083 325 3433.

Sanlam WOW Spelfees, eindronde, 20 Oktober 2018

 

Program: Afrikaans

08h30

Aankoms en registrasie van deelnemers langs RW Wilcocks Gebou in Ryneveldstraat.

09h15

Verwelkoming:

Graad 1–3: RW Wilcocks Gebou – Lokaal 1001
Graad 4: Geologie Gebou – Lokaal 1004
Graad 5–10 : Lettere en Sosiale Wetenskappe Gebou – Lokaal 230

Daarna beweeg leerders na die verskillende lokale.

Tyd

Item

Venue

Beskrywing

10h00

Graad 1

RW Wilcocks 1012 (Noordsaal)

Babbel: Klank van woorde

10h00

Graad 2

RW Wilcocks 1001 (onderste verdieping)

Babbel: Klank van woorde

10h00

Graad 3

RW Wilcocks 3001 (boonste verdieping)

Babbel: Spel van woorde

10h00

Graad 4

Geologie 1004

Babbel: Spel van woorde

10h00

Graad 5

GG Cillié Gebou (Opvoedkunde): 4029

Babbel: Spel van woorde

10h00

Graad 6

Lettere en Sosiale Wetenskappe Gebou: 230

Babbel: Spel van woorde

10h00

Graad 7

Lettere en Sosiale Wetenskappe Gebou: 223

Babbel: Spel van woorde

10h00

Graad 8

Lettere en Sosiale Wetenskappe Gebou: 225

Babbel: Spel van woorde

10h00

Graad 9

Lettere en Sosiale Wetenskappe Gebou: 227

Babbel: Spel van woorde

10h00

Graad 10

Lettere en Sosiale Wetenskappe Gebou: 229

Babbel: Spel van woorde

14h45

Prysuitdeling: Almal beweeg nou na die HB Thom Teater in Victoriastraat

 

Program: Engels Eerste Addisionele Taal

08h30
09h30
09h50

Aankoms en registrasie van deelnemers langs RW Wilcocks Gebou in Ryneveldstraat.
Verwelkoming: GG Cillie (Opvoedkunde) Lokaal 1028
Deelnemers beweeg na onderskeie lokale

Tyd

Item

Venue

 

Beskrywing

10h00

Graad 6

GG Cillié Gebou (Opvoedkunde)
(Education Building)

Lokaal 1028

Babbel: Spel van woorde

10h00

Graad 7

GG Cillié Gebou (Opvoedkunde)

Lokaal 3001

Babbel: Spel van woorde

10h00

Graad 8

GG Cillié Gebou (Opvoedkunde)

Lokaal 2004

Babbel: Spel van woorde

10h00

Graad 9

GG Cillié Gebou (Opvoedkunde)

Lokaal 2051

Babbel: Spel van woorde

14h45

Prysuitdeling: Almal beweeg nou na die HB Thom Teater in Victoriastraat

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top