Persvrystelling: Reisboek wen Andrew Murray-prys

  • 0

Die reisskrywer André Pretorius is bekroon met die Andrew Murray-prys 2018 vir sy boek Geloof alleen – uitgegee deur Naledi.

Die wenners van die Andrew Murray en Desmond Tutu-boekpryse vir 2018 is pas bekendgemaak. Die hoofprys – die Andrew Murray-prys vir algemeen-Christelike publikasies – is toegeken aan die reisskrywer André Pretorius vir sy boek Geloof allleen – Reise deur die Kerkhervormings. Die boek handel oor Pretorius se reise in plekke wat in verband staan met die Kerkhervorming wat verlede jaar 500 jaar gelede in Duitsland begin het.

Geloof alleen is Pretorius se vierde reisbundel. Hy is ’n prokureur van beroep en woon die afgelope twintig jaar in Cambridge.

Die boek se titel ten spyt is dit in die eerste plek ’n reisverhaal, eerder as ’n boek wat uit en uit oor geloof handel. Die reise vir hierdie uitsonderlike, moderne reisverhaal het hom die afgelope dekade geneem na Duitsland, Frankryk, Spanje, Italië, Indië, die VSA en die noord-Duitse plaas waar die Suid-Afrikaanse Pretoriusse vandaan kom.

Die leser kan Pretorius volg waar hy 500 jaar ná die begin van die Kerkhervorming op 31 Oktober 1517 in die spore van die groot Hervormers – Martin Luther en Johannes Calvyn – gaan loop. Maar hy reis verby Luther en Calvyn en besoek die plekke waar die sleutelepisodes van daardie grootse revolusie afgespeel het. Hy gaan na die plekke waar die godsdiensoorloë van die Hervormingsera ondenkbare verwoesting gesaai het, maar ook na die plekke waar die kreatiwiteit gebore uit die Protestantse verstaan van woorde en musiek van die grootste kunswerke van die mensdom geïnspireer het.

Elke leser wat lief is om te reis, of om oor reis te lees, sal kan saamreis na die plekke, kerke, mense, kos en wyn van vandag in dié plekke waar die kerkhervormers destyds probeer sin maak het van Middeleeuse godsdienstigheid. En dan bring Pretorius dit alles terug na sy eie plattelandse Suid-Afrikaanse, Calvinistiese opvoeding.

Resensente het Geloof alleen beskryf as "’n merkwaardige en tydige werk wat my ontroer het" (Fransjohan Pretorius), "van al die boeke oor die Hervorming die een wat die diepste indruk op my gemaak het" (André Bartlett) en "dié boek sal gelowiges en ongelowiges wat moeg is die dieselfde ou kerkdeuntjie aangenaam verras" (Jean Oosthuizen).

Die Andrew Murray-prys word toegeken aan ’n oorspronklike Afrikaanse algemene Christelike boek wat in die voorafgaande drie jaar verskyn het. Onder “algemene Christelike boeke” word verstaan boeke met ’n Christelike inslag wat in enige genre geskryf is (dagstukke, meditasies, romans, digbundels, ens) wat nie in eerste instansie vir ’n teologies-vakkundige gehoor bedoel is nie. Dit is die eerste keer dat dié gesogte prys aan ’n reisboek toegeken is.

Pretorius se veelbesproke boek oor sy reise in Italië, Italiaanse intermezzi, het in 2016 verskyn. Oor hierdie boek het die oudhoof van Tafelberg Uitgewers, Danie van Niekerk, gesê: “…een van die heel beste Afrikaanse reisboeke wat ek nog gelees het, in dieselfde klas as ’n Uys Krige, André Brink, Ernst van Heerden of WEG Louw.”

Verskeie noemenswaardige publikasies het hierdie jaar die kortlys gehaal waaronder:

  • Breekpunt deur Henk Gous, uitgegee deur CUM
  • Dansend met die lewe deur Kobus Anthonissen, uitgegee deur Naledi
  • Die reis gaan inwaarts deur Cas Wepener, uitgegee deur African Sun Media
  • Paulus deur Adrio Konig, uitgegee deur CUM
  • Weerlose weerstand deur André Bartlett, uitgegee deur Protea Boekhuis

Die Andrew Murray-prys vir Geloof alleen is Pretorius se eerste toekenning vir sy skryfwerk en die eerste publikasie van die uitgewershuis Naledi wat met die Andrew Murray-prys bekroon word.

Geloof Alleen – Reise deur die kerkhervorming deur André Pretorius
Uitgewer: NALEDI
Prys R279
Beskikbaar by alle goeie boekwinkels of by www.naledi.online.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top