Persvrystelling: Reaksie op die Vrystaatse Hooggeregshof se uitspraak

  • 0

Persvrystelling

Die Afrikaanse Taalraad verwelkom die Vrystaatse Hooggeregshof se beslissing dat die taalbedeling aan die Universiteit van die Vrystaat (UV) ongrondwetlik is dat dit neerkom op 'n flagrante skending van die grondwetlike taalregte van Afrikaanse studente.   

"Dit is skreiend dat die hof die UV as akademiese instelling moes teregwys, moes herinner aan sy verantwoordelikheid om ook Afrikaanse studente se akademiese sukses te verseker deur 'n instaatstellende taalbeleid daar te stel, in plaas daarvan om hulle in 'n ontmagtigende Engelse leerruimte in te dwing," het dr Conrad Steenkamp, hoof van die Taalraad gesê.

Die Taalraad doen 'n ernstige beroep op die UV se raad en senaat om in die lig van die hofuitspraak te besin oor 'n terugkeer tot 'n gelyke bedeling vir Afrikaans en Engels aan die universiteit en alle moontlike praktiese maatreëls te ondersoek en met ywer in te stel. So 'n bedeling sal nie slegs grondwetlik en opvoedkundig verantwoordbaar wees nie, maar sal ook verseker dat Afrikaans as gevestigde wetenskapstaal as 'n nasionale bate behou word en tot voordeel van kwaliteit onderrig benut kan word. 

Hierdie rigtende uitspraak is 'n oorwinning en baan die weg vir 'n billike bedeling vir Afrikaans en Engels nie net aan die UV nie, maar ook aan die ander universiteite waar Afrikaans tans ook onder druk verkeer.  Bowenal berei dit die weg voor vir die sprekers van ander Afrikatale om na gelang van die ontwikkeling van hul tale tot wetenskapstale, ook hul grondwetlike taalregte te kan opeis.

Die Taalraad vertrou dat die hofuitspraak tot groter insig in die waarde van moedertaalonderrig sal lei en so kalmte oor die taalbeleidskwessie aan universiteite tot gevolg sal hê.

 

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top