Persverklaring: Skryf in vir kykNET se Wie word ’n miljoenêr?

  • 2

Die wêreld se grootste en gewildste vasvraprogram ’Who Wants To Be A Millionaire’ is terug in Suid-Afrika. Die Afrikaanse weergawe, Wie word ’n miljoenêr?,  sal later vanjaar op kykNET (DStv-kanaal 144) uitgesaai word. Inskrywings is tans oop.

"Ons is baie opgewonde en geweldig trots daarop om die wêreld se gewildste vasvraprogram na kykNET te bring. Kykers kan uitsien na dieselfde 'Who Wants To Be A Millionaire'-ervaring wat miljoene mense wêreldwyd geniet. Ons kan nie wag om aan te kondig wie die aanbieder van kykNET se Wie word ’n miljoenêr? gaan wees nie,” sê Cecil Barry, vervaardiger van Wie word ’n miljoenêr?.

Staan jou algemene kennis uit en stof jy almal uit tydens ’n vasvra speletjie? Skryf in, want wie weet, dalk is jy goed genoeg om ’n allemintige R1 miljoen los te slaan.

Inskrywings sluit 6 Augustus 2021.

Diegene wat deurdring na die tweede ronde sal genooi word om ’n meervoudige keusetoets in Johannesburg of Kaapstad te skryf en ’n onderhoud te doen met die produksiespan. Sou dit nie moontlik wees om hierdie in persoon te doen nie, sal die opsie van ’n Zoom-onderhoud beskikbaar wees. 

Besoek kykNET se webwerf (https://kyknet.dstv.com) om die bepalings en voorwaardes te lees en om in te skryf.

Wie het gesê jy kan nie oornag ’n miljoenêr word nie? Komaan. Vat ’n kans! Vinnigste vingers eerste.

 

 

  • 2

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top