Thomas van Niekerk, Ané Fourie, Nic de Jager, Joanie Combrink en Albert Maritz
Thomas van Niekerk debuteer as regisseur met Misverstand deur Anene Loots.
Misverstand
Bert (Albert Maritz) vier oor ’n paar dae sy sestigste verjaarsdag. Sy vrou, Elna (Joanie Combrink), is bekommerd oor hulle huwelik wat sy vonk verloor het. ’n Jarelange vriend en wewenaar, Willem (Nic de Jager), oortuig Elna om ’n verrassingspartytjie vir Bert te reël. Elna besluit om vir Valerie (Ané Fourie), ’n junior ouditeur by Bert se maatskappy, te vra om haar daarmee te help. Bert begin vermoed dat Elna en Willem ’n verhouding het omdat hulle skielik WhatsApp-boodskappe vir mekaar stuur. Bert bekom ’n dwelmmiddel deur Valerie om Elna se bloeddrukpille te vervang. Die aand voor sy verjaarsdag en die oggend van sy verrassingspartytjie, gee hy van die dwelmmiddel vir Elna in. Sy raak onstabiel en gaan in ’n beswyming in. ’n Smoordronk Bert maak die deur vir die gaste oop en besef dit was als ’n misverstand.
Oor die skrywer, Anene Loots
Anene het in die sestiger- en sewentigerjare grootgeword en radio was deel van hulle daaglikse lewe. “Ek was van kleins af lief vir lees en stories maak en het elke middag die vervolgverhale geluister. Sondagmiddae, wanneer ons stil in ons kamers moes wees, het ek stories gemaak, die stories se verskillende karakters gespeel, myself met ’n bandopname opgeneem en dan die kasset teruggespeel,” vertel Loots.
Dit was haar droom om in radiodramas “te speel”. Anene het inderdaad die droom bewaarheid toe sy haar debuut as speler gemaak die in die radiodrama Leniesgif (2025).
Oor die regisseur, Thomas van Niekerk
“Die hele opname en alles wat daarmee gepaard gaan was vir my ’n voorreg en ek is RSG en almal betrokke baie dankbaar vir die geleentheid.”
Om met sulke groot name in die bedryf te werk, was vir Thomas ook ’n heerlike ervaring. Hulle het hulle insigte en talente ook gebring en dit was wonderlik om dit te sien.
Dit was ook heerlik om die vryheid te hê om musiek en byklanke te kies wat by die teks pas. Die postproduksie was vir hom die grootste leerskool, veral met die keuses van musiek. Thomas vertel hy het geleer om eerder meer as minder te hê, want in jou kop het jy dalk iets in gedagte, maar na die opname werk die musiek wat jy in gedagte het dalk nie.
Detail
Misverstand is geskryf deur Anene Loots. Die rolverdeling is Joanie Combrink, Albert Maritz, Nic de Jager en Ané Fourie. Die regisseur is Thomas van Niekerk.
Misverstand deur Anene Loots word op 11 Desember om 20:00 in Radioteater op RSG en rsg.co.za uitgesaai. Die regisseur is Ina Strydom. Die stuk is ook beskikbaar as potgooi en op Spotify na afloop van die uitsending.