Foto met vergunning van Philip de Vos
Lina Spies is een van Afrikaans se mees geliefde digters. Sy lewer ook belangrike bydraes as essayis, akademikus, literêre kritikus, vertaler en psalmberymer.
Hiermee word jy hartlik uitgenooi om tot hoogstens drie voorheen ongepubliseerde gedigte voor te lê vir die Lina Spies-huldigingsbundel wat later vanjaar by Naledi sal verskyn. Die bundel vier Lina Spies se onteenseglike bydrae tot die Afrikaanse poësie. Die voorgenome titel van die bundel, Onthou is die dag wat breek, is ontleen aan die gedig “Kringloop” uit Sulamiet (2016).
Digters word uitgenooi om in hul bydraes in gesprek te tree met of te reageer op Spies se digterskap en oeuvre, vanaf Digby Vergenoeg (1971) tot haar mees onlangse bundel, Aarde na firmament (2022). Hierdie digterlike gesprekke kan tematiese, intertekstuele, stilistiese aanknopingspunte vooropstel.
Hou asb. die volgende in gedagte:
- Digters wat reeds in bloemlesings soos Nuwe stemme, Maskers en mure en Merang gepubliseer het, of wat ten minste een solobundel by ’n erkende uitgewery uitgegee het, word genooi om gedigte ter oorweging voor te lê.
- Elke gedig moet as ’n afsonderlike abbalêer (“attachment”) aangeheg word.
- Benoem elke abbalêer soos volg: Titel van gedig_Naam en van van digter
- Gebruik 12 pt Arial, 1,5 spasiëring
- Die gedigte moet in Afrikaans geskryf wees.
- Geen beperkinge in terme van lengte en taalvariëteit word gestel nie.
- Geen korrespondensie sal oor afgekeurde gedigte gevoer word nie.
Moontlike tematiese aanknopingspunte in Spies se werk waarmee digters in gesprek kan tree sluit die volgende in:
- Die leefwêreld van die vrygesel (alleenstaande vrou)
- Die leefwêreld van kinders en die verlange na ’n kind
- Ikoniese vrouefigure soos Marilyn Monroe
- Katte (troeteldiere)
- Stellenbosch en die landskap van die Boland
- Religie en die Christelike geloof
- Kunstenaarskap (ook in die vorm van geprekke met visuele kunstenaars, musici ander digters soos Emily Dickenson)
- Die verhouding tussen Europa en Suid-Afrika
- Dubbele affiniteit vir die Boland én Nederland
- Die begogeling en ontgogeling van die liefde
Die sluitingsdatum vir voorleggings is 31 Maart 2026. Stuur jou voorlegging aan linaspieshuldiging@protonmail.com
Digtersgroete
Alwyn Roux en Neil Cochrane (samestellers)
Kommentaar
Beteken dit dat ongepubliseerde digters NIE vir die bundel in aanmerking geneem sal word nie?