Persverklaring: Kyk wie praat – weet jy hoe ’n kind se kop werk?

  • 0

Hoe goed ken jy kinders? Sê nou net ons vra ’n groep kinders tussen die ouderdom van ses en nege ‘n klomp vra, sal jy kan raai wat hulle antwoord is?

Indien wel, is dit nou jou kans om ’n deelnemer aan ’n nuwe speletjiesprogram op kykNET te wees. Daar is lekker pryse te wen wat gesinsnaweke en kontant insluit.

Die aanbieder van Kyk wie praat is die immergewilde De Klerk Oelofse. In elke program is daar nege kinders wat die vyf deelnemers op hulle tone gaan hou.

“Ek dink een van die slegste dinge van ouer word, is om so ’n stukkie van jou onskuld te verloor,” sê De Klerk. “Kyk wie praat is my kans om opnuut na die wêreld te kyk deur die oë van klein mensies. Dis natuurlik ’n bonus dat hulle vrek snaaks is!”

Die vyf deelnemers per program word rondte per rondte uitgeskakel tot net een oorbly. Op die spel is ’n gesinsnaweek indien die deelnemer genoeg punte versamel het. Daar is ook ’n kans om R10 000,00 per program te wen, maar indien dié bedrag nie gewen word nie, staan dit oor tot ’n boerpot-prys wat in episode 13, die finale program in die reeks, gewen gaan word. In hierdie program neem die vyf deelnemers deel wat die meeste punte in die vorige twaalf programme ingesamel het.

Klink hierdie na pret? Skryf dan in en jy kan moontlik een van die deelnemers wees. Die kinderdeelnemers vir die reeks is reeds gekies. Nou is die volwasse deelnemers – jy moet minstens 18 jaar oud wees - nodig. Kyk wie praat word van 5 tot 17 Junie in Kaapstad verfilm. Indien jy een van die deelnemers is, moet jy self tot by die ateljees in Montague Gardens waar die opnames gemaak word kom.

Hoe nou gemaak? Neem solank ‘n video van nie langer as twee minute van jouself op – vertel ons meer van jouself, of daar ’n spesiale kind of kinders in jou lewe is en hoekom jy dink jy die regte deelnemer vir so ’n program is. Ons het natuurlik ook jou naam, adres, telefoonnommer en e-pos-adres nodig.

Kliek hier om in te skryf.

 

 

 

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top