Persverklaring: ATKV verwelkom Marlene le Roux as direksielid

  • 0

Marlene le Roux, ’n bekende kampvegter vir Afrikaans, kultuur, die jeug en gestremdes, is tydens die ATKV se algemene jaarvergadering by ATKV-Klein-Kariba (Bela-Bela) verkies tot die direksie van die ATKV-MSW (maatskappy sonder winsbejag). 

Le Roux, sedert 2015 die uitvoerende bedryfshoof van die Kunstekaapteater, sê dis haar passie om ’n verskil te maak. "Ek wil deur kuns en kultuur uitreik na die diverse gemeenskappe in ons samelewing en ’n platform skep waar almal kan tuishoort, veral die gemeenskappe wat voorheen op kulturele, ekonomiese en sosiale vlakke gemarginaliseer is."

Sy is betrokke by verskeie organisasies, en is onder andere die voorsitter van die Stigting vir Bemagtiging deur Afrikaans, die Desmond and Leah Tutu Legacy Foundation en die Chrysalis Jeugakademie. Sy dien ook as lid van die Presidensiële Werksgroep oor Gestremdhede.

Dat Le Roux se werk wye erkenning – ook internasionaal – geniet, blyk uit die talle toekennings op haar indrukwekkende CV. Dit wissel van die Commonwealth Point of Light Award en ’n ministeriële toekenning van die Wes-Kaapse provinsiale regering tot toekennings van die Afrikaanse Taalraad en Franse regering (waaronder ’n ridderskap vir haar bydrae tot die uitvoerende kunste).

Le Roux het ná haar verkiesing gesê dat die ATKV se lede ’n baie belangrike rol speel. Sy het ook beklemtoon dat daar op die jeug gekonsentreer moet word. "Die jeug is nodig om die organisasie vorentoe te neem, die werk van die afgelope 89 jaar verder uit te bou en die organisasie se visie vir Suid-Afrika te implementeer."

Dirk Lotter is herverkies tot die direksie. Dirk dien die afgelope vier jaar reeds as lid van die ATKV-MSW-direksie in die sakeportefeulje. Hy dien ook op die direksie van ATKV-Sake en Hartenbos Seefront, asook op verskeie komitees van die ATKV.

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top