PEN Afrikaans: ’n Feestyd-boekbonus met die komplimente van Taalgenoot

  • 1

In die afgelope paar jaar het Afrikaanse skrywers en lesers gereeld met goeie reg gekla oor die krimpende ruimte vir boekbesprekings in koerante en tydskrifte. Weeklikse koerante se boekeblaaie het saamgesmelt en tydskrifte soos Insig en Boeke-Insig moes hul deure sluit.

taalgenoot_lente2015Dit is dus verblydend dat die kwartaallikse tydskrif Taalgenoot nog soveel prominensie gee aan resensies van Afrikaanse boeke, musiek en rolprente, onderhoude met skrywers en dergelike ander taalkwessies in ’n gehalte-publikasie met hoë produksiewaardes. Aangesien hierdie tydskrif tans slegs vir ATKV-lede en intekenaars beskikbaar is en hul boekeblaaie dus nie algemeen op die rak of  internet verkrygbaar is nie, het Donnay Torr, die redakteur van Taalgenoot, in oorleg met die bestuur van PEN Afrikaans gemeen dit sou gaaf wees om dié inhoud wat relevant vir lesers, leeskringe en skrywers is op PEN Afrikaans se webportaal beskikbaar te stel.

Met die klik van jou muis kan jy nou gratis ’n Krismisboks in PDF-formaat aflaai wat die volgende insluit:


 

Die Oppirak-afdeling met resensies van ’n verskeidenheid inkleurboeke vir volwassenes, Plasenta deur Peet Venter, Opdrag van oorkant deur Alta Cloete, Solitaire deur Vita du Preez, Komplot: Verwoerd moet dood deur André Krüger, Eugene de Kock: Sluipmoordenaar van die staat deur Annemari Jansen, Monstersaad deur Madelein Rust, Samsa-masjien deur Willem Anker, Boer kry ’n vrou deur Jan van Staden, Mara deur Lisette van de Heg, Die jaar toe Emma begin kook het deur Ilse de Korte, Saliger deur Didi Breytenbach, Takelwerk deur Daniel Hugo en Narokkong deur Riël Franzsen. Hierdie afdeling sluit ook ’n artikel oor Wellington se Tuin van Digters-fees in, besprekings van musiek deur Radio Lava en Elvis Blue, asook resensies van rolprente soos Sink, ’n Man soos my pa en Dis ek, Anna. Die resensie van laasgenoemde word aangevul deur onderhoude met Anchien Troskie (skrywer van Dis ek, Anna), Charlenè Brouwer wat die hoofrol vertolk het, en Niel van Deventer, die vervaardiger van dié fliek. Daar word ook gekyk na die dokumentêr oor die Boere-setlaars in Patagonië, Argentinië – Boere op die aardsdrempel.

pdf-png


tg_lien

 

’n Onderhoud met Lien Botha oor haar debuutroman, Wonderboom

pdf-png


 

’n Besinning van Herman Lategan oor Afrikaanse woorde wat verlore raak

pdf-png


tg_pg

 

’n Onderhoud met P.G. du Plessis wat ook een van sy gedigte insluit

pdf-png


 

’n Artikel oor die stand van Afrikaans 90 jaar nadat dit ’n amptelike landstaal geword het deur Danie Marais

pdf-png


tg_kuier
’n Artikel oor die Kuier/LAPA/PEN Afrikaans-kortverhaalkompetisie 2015

pdf-png


 

’n Artikel oor hoe taal werk in 'n huishouding waar die ma en pa se moedertaal verskil van mekaar

pdf-png


(LW: Die bogenoemde inhoud kom uit Taalgenoot se Lente 2015-uitgawe. Die kompetisies en pryse waarvan melding gemaak word, is reeds verby.)

Die bestuur van PEN Afrikaans is baie opgewonde oor hierdie samewerking met Taalgenoot. Baie dankie! Mag hierdie skryfwerk oor Afrikaanse woord- en rolprentkuns soos ’n veldbrand versprei en verskeie boeke nog voor 25 Desember in geskenkpapier beland.

Wil jy meer inligting oor Taalgenoot hê, inteken of dalk vir die tydskrif skryf?
Lees dan hier verder:

Vir meer as 83 jaar lank al vertel Taalgenoot (TG) die stories wat die vry- en volkleurwêreld van Afrikaans laat tiek. Ons strewe na besonderse werk, nie middelmatigheid nie, ons moedig verandering, vernuwing en kritiese denke aan. As amptelike kwartaallikse kultuurtydskrif van die ATKV, neem ons jou op ’n reis deur al die verskillende fasette van Afrikaanswees: die kunste, leefstyl en gemeenskappe wat ons besonderse kultuur kenmerk. TG spreek tot jonk en oud, tot kreatiewes en konserwatiewes. Dit is eenvoudig dié tydskrif vir mense wat in Afrikaans leef, liefhet en werk.

 “In die lewe bestaan ’n noue verwantskap tussen die gehalte van die pêrels wat jy aanbied, en die kaliber van die ontvangers daarvan. Hoe valser die pêrels, des te egter die swyne. Daarom het ek in my beroep die reël probeer volg om nie maar net aan die publiek te probeer gee wat hulle wil hê nie, maar ook ’n goeie dosis van wat hulle behoort te wil hê." –  Piet Cillié, Afrikaanse koerantredakteur en professor in joernalistiek, uit Eet jou rape eerste, 1980

Wil jy vir Taalgenoot skryf?
Stuur voorstelle en/of voorleggings direk na die redakteur, Donnay Torr: donnayt@atkv.org.za

Teken in op Taalgenoot
Teken in op TG en ontvang vier keer per jaar ’n tydskrif propvol interessanthede uit die volkleurwêreld van Afrikaans.

Jou opsies is:

Teken in op die digitale weergawe van Taalgenoot. Laai dit op jou rekenaar, skootrekenaar, tablet of slimfoon af:
www.mysubs.co.za/magazine/taalgenoot

Teken in op die drukweergawe van Taalgenoot.
Kontak Lillian Meyer by LillianM@atkv.org.za of 011 919 9112 of volg dié skakel vir die doen-dit-self-drukbare vorm en besonderhede: www.atkv.org.za/files/tg_-_intekenvorm_2015.pdf

  • 1

Kommentaar

  • Avatar
    Magriet Rossouw

    Dankie vir die deel van die artikels. Gaan verseker inteken op Taalgenoot sodra ons terug is van Frankryk.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top