Pasverskyn: Om te skryf (tweede uitgawe)

  • 1

Om te skryf (tweede uitgawe)
Uitgewer: Van Schaik
ISBN: 9780627039508

Hou jy van skryf in Afrikaans en wil jy boonop jou woordkuns in die digitale era verbeter? Sorg dan dat jy die tweede uitgawe van Om te skryf in die hande kry. Dit het ’n splinternuwe afdeling oor hoe jy jou boodskap so treffend moontlik vir digitale media kan verpak.

Wat dié boek besonders maak, is dat dit eerder wys as om vir jou te vertel hoe om te skryf. Jy loer as ’t ware oor mense se skouers en kyk hoe hulle met woorde werk.

Die 90 hoofstukke is besaai met meesterstukke oorspronklike teks, gevolg deur vrae wat jy kan beantwoord en voorstelle oor hoe jy self dié tegnieke kan bemeester.

Die grondslag van die boek was Kane en Peters se klassieke Writing prose. Van die beste tekste is daaruit vertaal, terwyl ander vervang is deur Afrikaanse voorbeelde met dieselfde strekking. Vars temas, soos digitale skryfwerk, is ook bygewerk.

Gevolglik bevat die boek tekste van befaamde woordsmede soos Plato, Ernest Hemingway, TE Lawrence, Dylan Thomas en EM Forster, om net enkeles te noem. Maar dan ook Afrikaanse name soos NP Van Wyk Louw, Etienne Leroux, Etienne van Heerden, Jeanne Goosen, Rachelle Greeff en Audrey Blignaut.

Skryfstukke van meningsvormers, rubriekskrywers en joernaliste word kwistig gebruik – van Thabo Mbeki en Emily Hobhouse tot Max du Preez en Johann Maarman, van Hanlie Retief, Anastasia de Vries en Haidee Muller tot Dana Snyman en Nataniël.

In die nuwe afdeling “Skryf in die media” deel Henriëtte Loubser, hoofredakteur van Netwerk24, en Hanlie Stadler, bedrewe digitale joernalis en sakeredakteur van Netwerk24, die kuns van digitale skryfwerk en “verpakking”.

Bun Booyens, gewese redakteur van Die Burger en Weg!, het sy hoofstuk “Om ’n berig te skryf” (wat reeds in die eerste uitgawe van Om te skryf verskyn het) bygewerk met digitale wenke.

Die res van die afdelings dek steeds ’n wye spektrum van skryfwerk – van skryf oor jouself, ander mense, gebeure, plekke en dinge, idees en oortuigings tot skryf om te definieer of te oorreed.

Daar is ’n afdeling oor hoe om jou skryfwerk te begin en te eindig en een wat die verskillende styl-nuanses van naderby bekyk.

Of jy nou ’n joernalis, student, leerling of lid van ’n leeskring is of net hou van skryf – hier is ’n boek met wonderlike leesstof asook praktiese skryfwenke.

Beskikbaar by Loot en Graffiti, en jou gunsteling-boekwinkel kan dit vir jou bestel. 

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top