Oor rassisme: Die ATKV bou aan ons erfenis

  • 1

Bekommerd oor wat op ons kampusse gebeur? Bekommerd oor die vlaag rassisme wat weer kop uitsteek?

Vroegoggend op 3 Maart 2016 het die ATKV ’n kort persverklaring oor rassisme uitgereik wat ook na al hulle lede gestuur is. ’n Aantal uur later, in Bonteheuwel op die Kaapse vlakte, het Japie Gouws, besturende direkteur van die ATKV-groep, hierop uitgebrei tydens ’n onderhoud met Amore Bekker op RSG.

In dié verklaring het die ATKV gesê miljoene Suid-Afrikaners is diep besorg oor die groeiende spanning tussen landgenote, die toename in rassevoorvalle en die geweld en vandalisme tydens protesoptredes by universiteite. Verskeie gesprekke oor rassisme en die negatiewe invloed daarvan op ons land is tans aan die gang. Die ATKV neem ook deel aan hierdie gesprekvoering, en wil dit onomwonde stel dat hulle enige vorm van rassisme verwerp.

“By die ATKV glo ons dat Suid-Afrikaners moet handevat en saamwerk om probleme en uitdagings die hoof te bied. Daarom wil ons ʼn beroep doen op Suid-Afrikaners van alle rasse om na mekaar uit te reik. Net deur mekaar beter te leer ken, kan ons mekaar verstaan en sáám bou aan ʼn beter Suid-Afrika,” sê Japie Gouws.

Gouws het ook gesê Suid-Afrikaners mag nooit vergeet hoe ’n ver pad ons die afgelope 22 jaar as demokrasie gestap het nie. “Dinge kon baie anders uitgewerk het, maar Suid-Afrikaners van alle rasse het al eenmaal bewys dat ons ’n pad van vrede kán stap in hierdie land. Ons durf nie toelaat dat vrees en woede ons van koers laat verander nie. Ons mag ook nie toelaat dat politieke leiers rassekwessies misbruik om vrees en onsekerheid tussen landgenote te saai nie.

Die ATKV doen ’n beroep op ATKV-lede, asook alle Suid-Afrikaners om hernieude oproepe vir versoening te ondersteun en te bevorder. Wanneer die geleenthede vir gesprekvoering opduik, sal ons by die ATKV in gesprek tree met individue, groepe en ook die regering ten einde ʼn nuwe vrede vir ons land te help bewerkstellig.”

Bonteheuwel, waar Gouws ’n paar uur later opgetree het, is ’n arm woonbuurt wat dikwels die pers haal weens bendegeweld. Dit is ook een van die kunsmatige buurte wat op die Kaapse vlakte gestig is ná die inwoners van Distrik Ses hulle huise verloor het.

Op 3 Maart om 15:00 is daar egter feesgevier in Bontheuwel. Die feesgeleentheid was die bekendstelling van Koelsoem Kamalie en Flori Schrikker se boek Kook saam Kaaps. Dié twee tannies van die Kaapse vlakte het bekend geword op Amore Bekker se program, Tjailatyd, deur met hulle heerlike Kaapse resepte in te bel en met die land te deel.

RSG, in samewerking met LAPA Uitgewers en die ATKV, het toe ’n bekendstelling gereël in die Bontehuewel. Die geleentheid is direk uitgesaai.

Tydens die uitsending het Bekker aan Gouws gevra waarom die ATKV geld sou spandeer op ’n resepteboek. Gouws se antwoord was: “Dit is ons erfenis. Die ATKV wil hierdie erfenis help bewaar.”

Hy verwys toe na standbeelde wat aangeval word en sê dat boeke soos Kook saam Kaaps nuwe maniere kry vir Suid-Afrikaners om saam te staan. Standbeelde is maar een deel van ons erfenis, deur saam te eet en resepte te bewaar vir die nageslag, bou ons aan nuwe maniere om rassisme te beveg.

Die hip-hop-kunstenaar Hemelbesem het by die geleentheid opgetree ná hy die hele dag in Mitchellsplein voorbrand gemaak het vir ATKV-Crescendo. “Ons soek jóú dialek,” was sy boodskap aan mense wat wil deelneem aan hierdie jaar se Crescendo.

Afrikaans bestaan uit vele stemme en vele dialekte en die ATKV wil met Crescendo ook daardie stemme vasvang as deel van Suid-Afrika se erfenis.

  • 1

Kommentaar

  • Rassisme. Die werklike probleem. Die werklike oplossing. Wette kan rassisme kontroleer/beheer. Opvoeding kan rassisme kontroleer/beheer. In wese is rassisme ‘n probleem van “inner-mens” wat elke mens op aarde raak. Besoek asseblief http://racismchristian.blogspot.com/

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top