Litnet

Remona Voges het met Ronelda S Kamfer oor die toneelstuk Wit isse colour wat by vanjaar se Toyota US Woordfees vertoon, gesels. Ronelda en Nathan Trantaal het die teks geskryf. 

Ronelda Kamfer (foto: verskaf)

Ronelda, jy en Nathan is beide digters. Hoe maak mens die sprong van digkuns na drama?

Ons is skrywers – dit is ’n baie natuurlike proses. Jy skryf iets, nie noodwendig vir een spesifieke vorm nie.

Watter vorm of struktuur neem die drama aan?

Jy sal moet kom kyk. Daar is ’n stel met twee akteurs, Ashwin Arendse en Tayme Philander. Hulle stel twee karakters voor, en die storie wentel rondom hulle twee se perspectives, oor hulself, hul gemeenskap en hul toekoms. Dit is hoekom ons vir Ashwin en Tayme het – die produksie maak staat op goeie akteurs wat met baie min die storie dra. Die teks is ook geskryf met hulle individual personalities in gedagte, sodat die karakters regtig hul eie word.

Ashwin Arendse (foto: kknk.co.za)

Hoekom is wit nou ’n colour? Wat het sedert die verskyning van Wit issie ’n colour nie verander?

Eerstens, ek dink te veel mense interpreteer daai titel te letterlik. Gaan lees gerus die storie, die lines is “Wit issie ’n colour nie, is ’n religion. Soes religions die wêreld oo wôd it vi jou gevoer…” Ras is ’n social construct, so ons moet probeer om dinge van meer as een perspective te kyk. Al is jy ook hoe krities van social injustices moet jy kyk na hoe jy self conditioned is en hoe jy glo en wat jy in glo.

Watter temas kom na vore in die dramateks?

Daar is karakters wat in die gedigte bestaan wat van naby ondersoek word en Bishop Lavis is in die agtergrond.

Is die drama in Kaaps geskryf?

Dit is irrelevant.

Is die temas in die drama temas wat ook in albei van julle se digbundels ondersoek word of ’n soort extension daarvan?

Ja , soos ek reeds genoem het, is karakters uit die gedigte wat meer nader ondersoek word.

Hoe is dit vir jou en Nathan om as ’n paartjie so na aan mekaar te werk?  

Is baie nice.

Ronelda se man, Nathan Trantaal (foto: verskaf)

Wat is die grootste uitdagings daarvan?

Dieselfde deadlines te het is terrible.

En die lekkerste deel van saamwerk?

Dieselfde deadlines te het en ná dit te kan films kyk.

Is julle vanjaar by enige ander Woordfees-produksies betrokke? Indien wel, kan jy asseblief meer daaroor vertel?

My gedigte word gebruik vir Krummelpap, afval en sunlightseep baddens deur die Garage-dans-ensemble, Alfred Hinkel en John Linden.

Na watter shows by die Woordfees sien jy uit?

Krummelpap, afval en sunlightseep baddens deur die Garage-dans-ensemble, Alfred Hinkel en John Linden.