Lus vir ’n aandjie uit? Bespreek nou jou Suidoosterfees-inryteaterkaartjie

  • 0

Foto: Markus Distelrath van Pixabay

Die Suidoosterfees en Atlantic Studios laat die klassieke inryteater herleef. Van 4 tot 15 November 2020 word feesproduksies in ’n splinternuwe baadjie geklee, en kan groter gehore vanuit die gemak en veiligheid van hul motors na feesaanbiedings op die silwerskerm kyk.

Produksies wat op die silwerdoek geprojekteer word, word direk opgeneem terwyl die kunstenaars op ’n buitelugverhoog optree. Inryteatergangers skakel in op ’n FM-radiofrekwensie om in hulle motors na die klankbaan van produksies te luister. Die geleentheid voldoen volledig aan vereistes ingevolge die COVID-19- nasionale gesondheids- en veiligheidsregulasies.

Volgens professor Brian Figaji, voorsitter van die Suidoosterfees-direksie, is gehore uitgehonger vir teater- en musiekproduksies. Die fees se inryteater bied ’n veilige uitlaatklep, danksy die ondersteuning van borge en die samewerking met Atlantic Studios. Jaco Loubser sê dat dié inisiatief 'n alternatiewe opsie vir optredes en inkomste aan kunstenaars voorsien. Inryteatergangers kan ook uitsien na heerlike ‘roadhouse’-etes wat vanuit die Kokkedoorstoor voorberei word.

Produksies om na uit te sien: Klopse Jol, PJ Powers en die Tygerberg-kinderkoor, Die Variety Show that skriks vir niks, Lottering in Lockdown, Francois van Coke en Early B, Koortjies met Jonathan Rubain en Lag my kla. Die vier topverkopers vir Suidoosterfees 2020, wat vroeër vanjaar as gevolg van die pandemie uitgestel moes word, was Kaapkreools, PJ Powers en die Tygerberg-kinderkoor, Die Variety Show that skriks vir niks en Marc Lottering. Gehore het nou die geleentheid om die produksies by die inryteater te geniet.

Die Adams-broers saam met ’n eg Kaapse Maleierkoor, Klopsegroep en ’n tienstuk-orkes wat die voete sal laat jeuk in die produksie, Klopse Jol! Die legendariese PJ Powers snoer talente met die Tygerberg-kinderkoor saam om ’n onvergeetlike musiek-extravaganza na die inryverhoog te bring. Feesgangers kan uitsien na treffers soos ‘Welcome to Africa’, ‘The right to learn’, ‘Jabulani’, ‘The world in union’ en ’n massauitvoering van ‘Shosholoza’.

Gehore kan ook uitsien na ’n gesamentlike optrede van Francois van Coke en Early B – Suid-Afrika se grootste rocker en rymkletser op een verhoog!

Gary Naidoo tree op in Die Variety Show that skriks vir niks, ’n vertoning wat die verhoog in ligte laaie laat opgaan met skreeusnaakse komedie en ’n jol soos net die Kaap kan gooi. In Marc Lottering se produksie vertel die supergewilde grapjas van sy avonture gedurende die grendelstaat. Kom skaterlag saam vir sy weergawe van aanlynvergadering en tuisonderrig.

 Lag my kla is die uitvloeisel van ’n aanlyn kompetisie wat van stapel gestuur is om nuwe komedie-talent te identifiseer vir verdere ontwikkeling. Met dié projek van Son, kykNET en die Suidoosterfees het Shimmy Isaacs, Rezah Forbes en Solomon Cupido nuwelinge se talent geslyp. Die wenners van 2020 se Lag my kla-kompetisie tree saam met hulle op.

Die eerste Afrikaanse gospel-televisiereeks, Koortjies met Jonathan Rubain, is een van die gewildste reekse ooit op kykNET en Kie. Gaste wat in die reeks te sien was, kom byeen vir ’n aanskoulike verskeidenheidsvertoning by die inryteater.

Kaartjies kos vanaf R250 per motor, en kan by Computicket bespreek word. Besoek die Suidoosterfees se webwerf (www.suidoosterfees.co.za) vir meer inligting. Verblyfpakkette by City Lodge is beskikbaar teen R1600 vir twee persone, en sluit bed en ontbyt, ’n inryteaterkaartjie en inry-ete in.

Hierdie inisiatief van die Suidoosterfees is moontlik gemaak deur die Departement van Kuns, die Wes-Kaapse Departement van Kultuursake en Sport, Stad Kaapstad, kykNET, NATi, Die Burger, Media24, Smile FM en Atlantic Studios.

So lyk die program

Francois van Coke en Early B
Ondersteun deur Netwerk24
Met Francois van Coke, Jedd Kossew, Richard Onraet en Early B
Venue: Atlantic Film Studios
Datum en tyd: 04 November 20:00
Tydsduur: 70 min
Prys: R250 per voertuig (maksimum 2 persone), R300 per voertuig (maksimum 4 persone)
Suid-Afrika se grootste rocker en rymkletser saam op een verhoog! Francois van Coke, sinoniem met Afrikaanse rock, is welbekend as solokunstenaar en die dryfkrag agter Fokofpolisiekar en Van Coke Kartel. Saam met hom op die verhoog: Early B, die gewilde rymkletser wat soos ’n masjiengeweer ryme met ongeëwenaarde klarigheid uitspoeg! ’n Musikale kragtoer deur twee formidabele talente wat jy nie durf misloop nie.

Klopse Jol!
Ondersteun deur SON
Met Loukmaan Adams, Emo Adams, ’n Maleierkoor en Klopsegroep, ondersteun deur ’n Big Band met 10 lede
Venue: Atlantic Film Studios
Vervaardiger: Vicky Davis, met CTMA
Skepper en regisseur: Loukmaan Adams
Musikale regisseur: Schalk Joubert
Datum en tyd: 11 en 12 November 20:00
Tydsduur: 70 min
Prys: R250 per voertuig (maksimum 2 persone), R300 per voertuig (maksimum 4 persone)
’n Unieke inryteater-feesproduksie met Kaapstad se voorste kunstenaars wat die stad se ryke kultuurtradisies laat leef. Die Adams-broers saam met ’n eg Kaapse Maleierkoor, Klopsegroep en ’n tienstuk-orkes wat die voete sal laat jeuk. ’n Ervaring wat musiekliefhebbers nie sommer sal vergeet nie.

Koortjies met Jonathan Rubain en vriende
Ondersteun deur kykNET
Met Jonathan Rubain en die koortjies-orkes, Seuns van Sion, Micheala Andrews, David Jantjies, Marco Spaumer (Tim) en Theresa Sedras (Mrs J) van Suidooster
Venue: Atlantic Film Studios
Datum en tyd: 08 November 20:00
Tydsduur: 100 min
Prys: R250 per voertuig (maksimum 2 persone), R300 per voertuig (maksimum 4 persone)
Die gewilde Afrikaanse gospel-TV-reeks, Koortjies met Jonathan Rubain, is nou ’n Suidoosterfees-inryteaterproduksie! Jonathan Rubain, wat al die wêreld vol opgetree het met kunstenaars soos Kirk Whalum, betower feesgangers met bekende plaaslike musiekvriende soos Seuns van Sion, Micheala Andrews, Marco Spaumer (Tim) en Theresa Sedras (Mrs J) van kykNET se supergewilde sepie, Suidooster.

Lag my kla’
Ondersteun deur SON en kykNET
Met Solomon Cupido, Rezah Forbes, Shimmy Isaacs, Schalk Bezuidenhout, Wayne McKay, Melt Sieberhagen, Alfred Adriaan en wenners van die Lag my kla-kompetisie
Vervaardiger: Erns Grundling
Venue: Atlantic Film Studios
Datum en tyd: 05 November 20:00
Tydsduur: 100 min
Prys: R250 per voertuig (maksimum 2 persone), R300 per voertuig (maksimum 4 persone)
Bekende grapjasse Solomon Cupido, Rezah Forbes en Shimmy Isaacs het as mentors vir die Lag my kla’-kompetisie opgetree. Nou verskyn hulle op die verhoog met blinknuwe wenner-komediante. Schalk Bezuidenhout, Alfred Adriaan en Melt Sieberhagen maak ook hul verskyning. Feesgangers gaan poegaai wees van al die lag vir dié skreeusnaakse span by die Suidoosterfees @ Atlantic-inryteater. Kom geniet dié vrolike viering van die fees se suksesvolle sinergieprojek met Son en kykNET.

Lottering on lockdown
Ondersteun deur SON
Met Marc Lottering
Regisseur: Anwar McKay
Venue: Atlantic Film Studios
Datum en tyd: 13 November 20:00
Tydsduur: 70 min
Prys: R250 per voertuig (maksimum 2 persone), R300 per voertuig (maksimum 4 persone)
Vir hierdie vertoning bring Suid-Afrika se supergewilde komediant sy snaaksste stories uit twee aanlynvertonings, My fellow South Africans en Another One, byeen. En geen onderwerp bly onaangeraak nie. Maak jou gereed vir ’n skreeusnaakse blik op dinge soos Zoom-vergaderings en pa’s en ma’s wat hulle bloedjies skielik self by die huis moet onderrig.

PJ Powers in Konsert met die Tygerberg Kinderkoor
Ondersteun deur Die Burger
Met PJ Powers en die Tygerberg Kinderkoor o.l.v. Karina Erasmus, ondersteun deur die PJ Powers band: Tigger Reunert (kitaar), Schalk Joubert (baskitaar), Rollins Mankge (klawers) en Kevin Gibson (dromme)
Musikale regisseur: Tigger Reunert
Koorverwerking: JP de Villiers
Vervaardiger: Vicky Davis, met CTMA
Venue: Atlantic Film Studios
Datum en tyd: 14 November, 15 November 20:00
Tydsduur: 75 min
Prys: R250 per voertuig (maksimum 2 persone), R300 per voertuig (maksimum 4 persone)
PJ Powers, ’n Suid-Afrikaanse legende, snoer talente saam met die Tygerberg-kinderkoor om hierdie musiek-extravaganza na die feesverhoog te bring. PJ se onblusbare energie, tesame met die mooiste koorklanke en haar uitmuntende orkes, saamgestel uit van die land se top rock-musikante, gaan ’n onvergeetlike ervaring wees. Feesgangers kan uitsien na treffers soos Welcome to Africa, The right to learn, Jabulani, Sanbonani, Destiny, The world in union en Shosholoza.

The Variety Show that Skriks vir Niks
Ondersteun deur DKES
Met Gary Naidoo, Riyaan Cornelius, Janine Cornelius en Cindy Gibbons
Regisseur: Rafiek Mammon
Venue: Atlantic Film Studios
Datum en tyd: 06 November, 07 November 20:00
Tydsduur: 90 min
Prys: R300 per voertuig
Vermaak uit die boonste rakke! ’n Show wat die verhoog in ligte laaie laat opgaan met skreeusnaakse komedie en ’n jol soos net die Kaap kan gooi. Stel jou voor: verskeie kunstenaars en al jou gunstelingliedjies vanaf die 1960s tot nou. Met Gary Naidoo in die hoofrol en Rafiek Mammon in die regisseurstoel.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top