LitNet Akademies-artikels met 2021 ATKV-SA Akademiepryse bekroon

  • 0

Daan Wissing, Elvis Saal en Donovan Lawrence (Foto’s verskaf)

Daan Wissing, Elvis Saal en Donovan Lawrence, navorsers wie se artikels in 2019 in LitNet Akademies se Geesteswetenskappe-afdeling gepubliseer is, het twee van die ATKV en die Suid-Afrikaanse Akademie vir Wetenskap en Kuns se ATKV-SA Akademiepryse vir geakkrediteerde akademiese artikels in Afrikaans ontvang.

Daan Wissing, wie se artikel “Perspektief op /ɛ/-verlaging in Afrikaans” bekroon is, is verbonde aan Noordwes-Universiteit se Sentrum vir Tekstegnologie (CTexT®). Elvis Saal en Donovan Lawrence, medeskrywers van “‘Ons skryf soos ons praat’: Informalisering van geskrewe Afrikaans onder Afrikaanse tieners”, doseer in die Universiteit van Wes-Kaapland se Departement Afrikaans en Nederlands.

Etienne van Heerden, hoofredakteur van LitNet Akademies, sê: “Ons almal by LitNet en Voertaal is trots op hierdie uitstekende navorsers. Baie geluk aan hulle en aan Francis Galloway, ons redakteur vir die Geesteswetenskappe-been van LitNet Akademies. Ek wil eintlik die hele LitNet-span gelukwens. Hierdie erkenning deur die ATKV en die Akademie is ’n veertjie in die hoed van my hele span, en ’n spesiale eer vir die wenner-navorsers.”

Francis Galloway, LitNet Akademies se Geesteswetenskappe-redakteur, het ook haar gelukwensing aan Wissing, Saal en Lawrence oorgedra: “Dit is artikels van hierdie aard en kwaliteit wat Afrikaans as akademiese taal behou én uitbou,” het sy gesê.

In 2020 is Johann Beukes en Rinda Botha, twee navorsers wie se artikels in 2018 in LitNet Akademies gepubliseer is, ook met ATKV-SA Akademiepryse bekroon.

Die ATKV stel jaarliks prysgeld van R60 000 beskikbaar vir die bekroning van ses gepubliseerde Afrikaanse artikels wat in ’n betrokke jaar in ’n geakkrediteerde tydskrif verskyn het, dus R10 000 per artikel. Vier van die pryse is bestem vir artikels in die geesteswetenskappe en twee vir artikels in die natuurwetenskappe. Die keuringsproses vir die pryse word deur die Suid-Afrikaanse Akademie vir Wetenskap en Kuns hanteer.

Ander navorsers wat ook vanjaar met ATKV-SA Akademiepryse vir geakkrediteerde akademiese artikels in Afrikaans bekroon is, is:

Geesteswetenskappe

  • Hans Heese en Ulrich van der Heyden van die Universiteit Stellenbosch en die Universiteit van Suid-Afrika onderskeidelik vir hulle artikel “Klaas Koen en etnografiese verwarring in die negentiende-eeuse Kaapse samelewing” in Suid-Afrikaanse Tydskrif vir Kultuurgeskiedenis, 33(2), Desember 2019.
  • Casper Lötter vir sy artikel “Vrygelate gevangenes word as gevangenispersoneel aangestel: Kan Suid-Afrika leer by hierdie nuwe internasionale tendens?” in Tydskrif vir Geesteswetenskappe, 59(4), 2019.

Natuurwetenskappe

  • Johan O Nöthling van die Departement Produksiedierstudies en Jan G Myburgh, Eksotiese Leer Navorsingsentrum, Fakulteit Veeartsenykunde aan die Universiteit van Pretoria, Onderstepoort, en Johan A Nöthling, Departement Fisika aan die Universiteit van Pretoria, vir hulle artikel “’n Model om Nylkrokodileiers se volumes mee te skat nadat hulle uitgebroei het” in Suid-Afrikaanse Tydskrif vir Natuurwetenskap en Tegnologie, 38(1), 2019.
  • Stefanus Otto, Orbett T Alexander en Andreas Roodt van die Departement Chemie aan die Universiteit van die Vrystaat, vir hulle artikel “Waargenome struktuur- en reaktiwiteitsverwantskappe in trans-[PtPh(L)2Cl] tydens die verplasingreaksie van Cl- deur I- na verandering van die fosfien-, arsien- en stibienligande (L)” in Suid-Afrikaanse Tydskrif vir Natuurwetenskap en Tegnologie, 38(1), 2019.

Al die artikels is in 2019 gepubliseer.

Besoek LitNet Akademies se invalsblad hier.

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top