Jeugresensie: Die laaste geveg deur CS Lewis

  • 1

dielaastegevegTitel: Die laaste geveg
Skrywer: CS Lewis
Illustreerder: Pauline Baynes
Uitgewer: Protea Boekhuis, 2015
Genre: Jeug/Klassiek
ISBN: 9781485302209

• Resensie deur Nina Swart (gr 8; 14 jaar oud)

Die jaar toe ek in gr 4 was, het ’n juffrou eendag aangekondig dat ons The Chronicles of Narnia in die klas gaan kyk. Ek was nie lus daarvoor nie, want ek hou meer van realistiese stories met mensekarakters – nie diere wat kan praat nie. Dalk het ek net nie daardie dag lekker gevoel nie of was ek nie lus vir fliek nie ... ek weet nie. Ek het toe maar op my arms gaan lê. Die juffrou het vir my gesê as dit my houding is, kan ek maar net sowel buite die klas gaan sit terwyl die ander fliek.

Ek was baie bang die hoof kry my daar op die stoep en dan is ek in nog groter moeilikheid, dus het ek toe maar vir die res van die fliek op my arms bly lê en gemaak of ek nie lekker voel nie. (En ek hét nie lekker gevoel nie, want ek het mos al gesê ek hou nie van onrealistiese stories waar diere kan praat nie.) Die res van die klas was mal oor die fliek en party van hulle het dit al ’n paar keer gesien.

Miskien was ek net hardkoppig, maar ek het daardie dag besluit Narnia val in elk geval nie in my smaak nie. Ek het as’t ware ’n gly in Narnia gekry. Toe ek dus vier jaar later hoor dat ek ’n Narnia-boek moet lees vir ’n resensie, was ek nie beïndruk nie. En ook nie lus nie (ek het weer eens “nie lekker gevoel nie”).

Nadat ek die boek klaar gelees het, kan ek egter eerlikwaar sê dat ek aangenaam verras is. Dit is nou wel nie my gunstelingboek ooit nie, maar ek sal ook nie meer weier om die ander boeke in die reeks te lees nie. Ek sal selfs vir my ma vra om hulle maar vir my te kry. En ek sal die fliek ook kyk.

Ek het nou ook eers uitgevind dat Clive Staples Lewis eintlik beskou word as een van die grootste skrywers van die 20ste eeu. Hy het meer as 30 boeke geskryf en hoewel hy al dekades gelede dood is, lees mense steeds sy boeke. Die Narnia-reeks is seker die gewildste daarvan en daar is oor die jare meer as een miljoen kopieë wêreldwyd verkoop.

Die laaste geveg is die sewende en laaste boek in die Kronieke van Narnia-reeks. Nadat ’n onnosele aap met die naam Swendel sy vriend Warboel die donkie soos Aslan – die koning en god van Narnia – laat vermom het (Aslan is ’n leeu), breek daar chaos en konsternasie uit. Die diere en dwerge glo hy is die ware Aslan. Tirian en Juweel (sy eenhoring) word gevang. Daar is chaos en ’n dreigende oorlog. Eustace Scrubb en Jill Pole is hierdie keer die twee wat kom om te help.

Sonder dat enigiemand dit ooit sou kon dink, moet hulle hulself regmaak vir die grootste en gevaarlikste geveg waaraan hulle nog ooit deelgeneem het. Maar koning Tirian se mense wil nie kant kies nie, want hulle is bang ná al die leuens wat die aap aan hulle vertel het. Nou moet die koning met slegs ’n handjievol getroue Narniane teen ’n hele weermag van wrede, slegte, skelm, agterbakse Kalormene te staan kom.

Daar is tye waar die boek so spannend is dat ek eers my naels moes gaan sny voordat ek verder kon lees. Of plekke wat net só goed beskryf is dat ek seker was dat wanneer ek opstaan, ek in ’n wêreld van hoë berge en groot bome sou staan, pleks van op my bed in my kamer. Ander dele het my mond laat water (“... in vergelyking met daardie vrugte is die varsste pomelo wat jy nog ooit geëet het smaakloos, die sappigste lemoen droog, die sagste peer wat in jou mond smelt hard en houterig, en die soetste wilde arbei suur. En daar is niks sade of pitte, en niks perdebye nie.” bl. 136). En skielik het ek onthou dat ek ook al ander boeke gelees het waarin diere kon praat (en wat terloops van my beste boeke ooit was, soos Droomoog Diepgrawer deur Leon de Villiers en Joran Noordewind deur Lilli Thal).

As ek nou terug in gr 4 was, sou ek maar onderdeur my arms geloer het. En ek sal selfs vir my ma vra om vir my die ander boeke in die Narnia-reeks aan te skaf. Dit is Die towenaar se neef, Die leeu, die heks en die hangkas, Die perd en sy seun en Prins Kaspian (almal uitgegee deur Human & Rousseau & Jonathan Ball). En dan die laaste drie wat deur Protea Boekhuis uitgegee is: Die vaart van die Dagbreker, Die silwer stoel en Die laaste geveg.


Vir Narnia-liefhebbers:

Writer of the Week: A decade of Lauren Beukes

LitNet
Books & Writers 

Die silwer stoel deur CS Lewis

Marike van der Watt
Resensies


 

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top