Huis, woning, tuiste: Susanne Pike se inskrywings

  • 10

Huis van Brood

pluk vir my die wyse ster wat
oor die stalbed wei;
werp dit op my water
(soos uit die Huis van Brood)
dat’k óók rus kan kry
oor eersgeborenes se dood:

’n engel’t mos met oordeelsverf
my deurkosyn in bitterbloed uit
’n bevlekte lam laat sterf –

te laat besef dat net
edel offergoed ’n kaartehuis
van die tiende plaag
kan red

 

my huis is waar my hart is

my huis is ’n boek vol
biblioteekstiltes

leë donkerkamers waar asems spook maak
in gisters se
e   g   g   o ’s;

gammas en lemmas uitgegrif in klip:
babelwoorde geïnkanteer
bybelwoorde geïnkarneer

my huis is ’n museum van
motgevrete mites
(kaias vir gaias)
’n meridiaan
vir god en onderdaan

’n kerker vir gevalle indoenas:
’n oop-en-blote beeldenis

’n uilhuis vir (eie)wyses

my huis is waar my hart is

 

herbarium van verbale mishandeling

die vrou wou dit nooit erken nie –
díé kavalkade afknouery;

ingekrink in sy besope woorde
het sy, boomvrou wat sy was,
haar krom dennerug
weer opgerig na ’n dounat lug;

kruidjie-roer-my-niete
uit haar verlepte oë uitgepluk
doringwoorde         weggeruk

v   e   r   p  l   a  n   t

vergifnis     vergifnis     vergifnis    ingespit
tot haar baskloue oop wou kraak;
haar sat sooie dooie sade braak –

oor turksvytonge het sy stil gegryns:

elke huis het sy fokken kruis
(elke herbarium sy gekneusde mimosa)

 

sondaghuis

uit ’n vreemde voortuin
het hy met sy windhondlyf
en soutmynlag hul huis
i  n  g  e  d  r  a  f –

sabbatsange in sy taal geneurie

sy bouershande twee betonblokke
wat ritmies graaf en spit en sooi;

die droogdooi phalaenopsis in die rooi Woolworths-bak
vlak verplant in arm grond
tot dit as wit wasdom blom

sy sir en ma’am het respek bely

laatmiddag sy skoffelkleed vir ZCC verruil;
die Spar-hoender met Sprite gesluk –
moeg gebuk,
sy slonsskoene uitgepluk
en weggevlug
uit Plasticville se konkalug

die sir en ma’am klink elk ’n kelk
teen sondagskemer, spogtrots op
hul ontwerperstuin, lig die glas dat die laaste lig
sjampanje vang,
terwyl sy klam
gehoes … hoes … hoes
nog dawerend teen die grasdak hang


 

Klik hier vir volledige inligting oor die kompetisie.
Klik hier om ander inskrywings te lees.

huis1_650

  • 10

Kommentaar

  • Avatar
    Linda van Niekerk

    Susanne se invalshoek vir 'n tema wat digters uitdaag om oorspronklik en vars te dig is uit die boks, onverwags 'n verrassing. Welgedaan.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top