Filmresensie: Vergeet my nie

  • 14

Vergeet my nie is, wel, vervelig. (Ek wou eintlik sê vergeetbaar, maklik om te vergeet, of iets in dier voege, maar het myself gelukkig in toom gehou.) Die flou kamerawerk, die eentonige klankbaan, die stomp dialoog, die narratief is als, wel, vervelig. So ook die lokprent en die plakkaat. Die film is boonop amper twee uur lank.

Goed, ek weet ek vergelyk dit met Huisgenoot se eerste film, Vir die voëls, wat besonders was – van die uitstekende lokprent tot die humor, toneelspel, boeiende agtergrondstories, ens. Hoekom nié die twee films vergelyk nie? Huisgenoot behoort mos van krag tot krag te gaan met hul films? En nie bloot ʼn volgende film vry te stel omdat die eerste een byna tien miljoen gemaak het nie?

Vir die voëls het weldeurdag oorgekom, asof dit met groot moeite aanmekaar gesit is met ʼn klem op emosionele diepte. Daarteenoor voel dit asof Vergeet my nie aanmekaargeflans oor ʼn naweek, ʼn made for TV-film, ʼn geldmaker wat die volk sal vermaak en dus nie veel vleis aan die been hoef te hê nie. Vir die voëls, daardie rare kombinasie van ʼn besonderse film wat ook uiters goeie vermaak is, het nie sy kykers so onderskat nie. Dit sal interessant wees om te sien of Huisgenoot se tweede film finansieel so suksesvol gaan wees soos hul eerste.

Vergeet my nie se snellerpunte is ooglopend en dus onoortuigend – Hugo wat “Lisa se klavier” sing en dan die ou in die kroeg wil klap; die bakleiery oor die Ministry of Sound-konsert; Mardaleen se jaloesie op Thea; Mardaleen se werksaanbod in Kaapstad. Jy sien dit op ʼn myl aankom.

Al die tonele tussen Mardaleen en die Britse skrywer Vivian (Fiona Ramsey) was stereotipies en stroperig. Cringeworthy, soos die Engelse sê.

Die enigste interessante aspek van die film is Sean-Marco Vorster wat geobjektiveer word. Hy is meestal hemploos, maar ook persoonlikheidloos.

Vergeet my nie is ʼn vervelige, haastig-aanmekaargeplakte film, waarvan die enigste doel was om geld te maak.

  • 14

Kommentaar

  • Barend van der Merwe
    Barend van der Merwe

    Hoeveel van ons Afrikaanse films is iets waarop mens trots kan wees? Weinig. Dit gaan met Afrikaanse films soos dit gaan met Afrikaanse musiek. Dit is by uitsondering van goeie gehalte. Yl gesaai. En elke keer gaan martel ons onsself maar net weer omdat ons tog ons eie wil ondersteun.

  • Avatar
    Reney Warrington

    Ons filmindustrie is nog jonk, so ons moet vrot eiers te verwagte wees. Ek dink wil die standaard het baie verbeter. Poppie Nongena wat tans wys is meesterlik, en Toorbos wat in Mei uitkom is 'n belewenis. Ek sal aanhou plaaslike films ondersteun en maar my (subjektiewe) opinie lig oor die minder goeie inskrywings.

  • Avatar
    Maria-Magdalena van Vuuren

    Ek stem heelhartig saam. Onwillekeurig wil en sal en mag jy “VMN” met “Vir die voëls” vergelyk. Die akteurs se projeksie is regtig ongelukkig twyfelagtig. Alle fliekgangers kla dat die film skynbaar “te sag” vertoon word. Nadere betragting bring die gebrek aan duidelike uitspraak en projeksie na vore.

  • Avatar
    Cobus van den Berg

    Oh my word. Jan jy is seker in die politiek ... Tegnies is die filmbedryf die 2de oudste in die wêreld maar as dit oor volume en ondervinding gaan is ons in die babawiegie. Watter punt wil jy graag maak?

  • Avatar
    Reney Warrington

    Maria-Magdalena, dit is nou wêreldwyd 'n probleem, die sogenaamde 'mumbling'. Mens wil mos goeie dialoog hoor? Ek sien meer en meer mense in die teater wat die persoon langs hulle stamp en vra, Wat sê hulle?

  • Avatar
    Theodorus du Plessis

    En die akteurs het kennelik nie diksie onder beheer nie. Was dit nie vir die Engelstalige ondertitels nie, sou ek die meeste van die gemompelde en binnensmondse dialoog gemis het. Ai...

  • Avatar
    Jakkie Groenewald

    Dis Afrikaanse filmbedryf is glad nie jonk nie. Die eerste Afrikaanse film, "Die Voortrekkers" het in 1916 vrerskyn. Dus is die bedryf reeds 104 jaar oud.

  • Die eerste Suid-Afrikaanse rolprentateljee is al in 1915 geopen. Het juis die naweek weer na "Daar kom tant Alie" met Wena Naudé en Wilna Snyman gekyk. Dit dateer uit 1976. Dis filmies met 'n knap draaiboek; nie vir TV verfilm nie. Ek begryp nie die opmerking dat die industrie (sic) jonk is nie? Die geskiedenis vee so 'n opmerking met gemak van die tafel.

  • Avatar
    Reney Warrington

    Kobus, ek het mos die stelling verduidelik in kommentaar hierbo. Die nuutste siklus/gedaante van die industrie...

  • Avatar
    Maria Magdalena Van Vuuren

    Reney, ek stem heelhartig saam. Verstaan presies, wat jy bedoel ... Veral, uit die rolprentwese (1991-semestervak) waar die nimlike, uiters perfeksionistiese Coenie de Villiers hierdie informasie ingeprent het.

  • Haha, Cobus van den Berg, jy het ook nie jou feite agter mekaar nie. 2000 films voor 1994, so kom ons praat volume. Onthou ons regering was teen TV tot 1976, so ons het net films vervaardig. En onderviding is daar baie. Die wat dit gehad het is baie nie meer met ons nie. En baie sit deesdae in NY en LA.

    As jy kyk na reekse soos bv. Arende, Konings, Balade Vir n Enkeling etc. was ons bedryf on par waar die voorste lande ook in 1989-1990 was. Agv ons land se transformasie het die bedryf stil gestaan tussen 1994-2004. En toe skrik ons ewe skielik wakker en dink ons begin 'n nuwe Afrikaanse bedryf. En ons vergeet skoon wat alles voor 1994 gebeur het. Mens noem dit 'n 'new wave' by the way. Gaan lees oor die Franse film geskiedenis.
    En jy weet duidelik nie wat in die film service industrie aangaan in die Kaap nie, as jy van ondervinding praat nie. Ons film crews word as van die bestes in die wêreld gesien. Mense soos julle wat dink julle is smart is toe nie rerig so smart nie...

  • Ek was gaande oor die fliek! Ek het gehou van die storielyn want dis presies hoe dit was met ons generasie is 1998 tot 2000. Almal was London toe. Meeste van ons het dit gedoen net vir die geld. Ek hou van elke liewe akteur en aktrise in die fliek. Ek voel van vooraf verlief! En nog iets, dankie dat ons as gesin dit kon kyk! Dis heerlik om iets te kyk wat nie vulgêr is nie.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top