Litnet

Danie van Wyk skryf op Facebook:

’n Vriend, ’n  kameraad, oud-kollega, onderwysleier, taalaktivis, vakbondleier van formaat, oud-Parlementslid, Randall van der Heever, (74), het Vrydag gesterf. Dit kom as ’n groot skok, alhoewel ons geweet het dat hy gesondheidsuitdagings die laaste jare van sy lewe ervaar het.

Randall het verskeie publikasies oor die toekoms van Afrikaans die lig laat sien onder andere Tree na Vryheid en Alternatiewe Afrikaans, wat ’n samevatting was van die uitkomste van ’n beraad oor die toekoms van Afrikaans in ’n na-apartheidsbewind. Hy sal onthou word vir die keurige Afrikaans wat hy altyd gebesig het.

Hy was ’n voormalige skoolhoof van Spes Bona Hoërskool in Athlone, en het Franklin Sonn opgevolg as president van die destydse Kaaplandse Professionele Onderwysersunie.

Ná die unifikasie van verskeie onderwysorganisasies, is hy aangestel as die eerste sekretaris van SADTU voor hy in 1994 aangestel is as ’n ANC-parlementslid.

Ek het destyds as ’n jong onderwyser by die KPO as lid aangesluit omdat David Piedt en ander onderwysers die organisasie as ’n gemeenskapsorganisasie en politieke beweging onder bruinmense gesien het, en nie slegs as ’n onderwysunie nie.

Randall het ’n groot rol in hierdie oorgangsjare gespeel. Die KPO se aanvaarding van die Vryheidsmanifes as ’n leidinggewende dokument vir die organisasie getuig hiervan.

Hy, Sonn en Jakes Gerwel was deel van die Dakar-groep wat die ANC in Dakar in die 1980’s ontmoet het.

In sy laaste jare het hy hom in Beaufort-Wes gevestig.

Rus sag my broer tot ons eendag weersiens vier.

My innige meegevoel aan sy vrou, Cheslain en ander naasbestaandes.