Die SA Akademie wag nominasies in vir die toekenning van Akademiepryse in die kategorieë wat in 2022 aan bod kom.
Die finale sluitingsdatum vir nominasies is 15 Februarie 2023 (behalwe waar anders vermeld).
Graag vestig ons u aandag op die Akademiepryse wat gedurende 2023 vir toekenning oorweeg word. Volledig gemotiveerde voorstelle vir enigeen van hierdie pryse word ingewag. Die volgende geld ten opsigte van die voorstelle:
|
Geesteswetenskappe
NP van Wyk Louwprys vir Geesteswetenskappe
Die prys word jaarliks toegeken aan ’n persoon vir sy/haar skeppende bydraes tot die ontginning, organisasie en die volgehoue uitbouing van ’n vertakking of vertakkings van die geesteswetenskappe en wat as ’n wesenlike en belangrike bydrae tot die bevordering van die geesteswetenskappe beskou kan word. Die prys kan ook toegeken word aan persone wat werk van die hoogste gehalte gelewer het ter bevordering van die Afrikaanse taal en kultuur.
Die prys is een van die toppryse van die Akademie en word toegeken vir ’n betekenisvolle bydrae tot die bevordering van die geesteswetenskappe en kan daarom slegs een maal aan ’n persoon toegeken word. ’n Kandidaat moet naas hoëgehaltepublikasies ook bewys lewer van die bevordering van sy/haar vakgebied in Afrikaans. Dit kan onder meer inhou studieleiding; redaksionele werk in Afrikaans; populêre bydraes in die media; optredes by kongresse of seminare; bereidheid om werk in Afrikaans te laat vertaal, ensovoort.
Stalsprys
Die Stalsprys is ’n jaarlikse prestigeprys wat toegeken word vir oorspronklike navorsing op die gebied van die geesteswetenskappe en kan net een maal aan ’n bepaalde persoon toegeken word. Die prys word toegeken vir die volgende:
- ’n Hoogstaande publikasie of ’n reeks sodanige publikasies wat wetenskaplike werk van die hoogste gehalte verteenwoordig;
- Individuele of gesamentlike wetenskapsbeoefening en/of die lewering van individuele of gesamentlike produkte van hoogstaande gehalte.
Indien die werk van ’n kandidaat wie se wetenskaplike werk grootliks in Engels of ’n ander taal gelewer is, moet bewys gelewer kan word van die bevordering van sy/haar vakgebied in Afrikaans. Dit kan onder meer inhou: studieleiding; redaksionele werk in Afrikaans; populêre bydraes in die media; optredes by kongresse of seminare; bereidheid om werk in Afrikaans te laat vertaal, ensovoort.
Die vakgebiede roteer jaarliks en in 2023 kan ’n prys in een van die volgende vakgroepe toegeken word: Sosiale wetenskappe waaronder antropologie; maatskaplike werk; kriminologie; sielkunde; sosiologie; filosofie; geskiedenis, politieke wetenskap; joernalistieke navorsing.
Markus Viljoenmedalje vir Joernalistieke Prestasie
Die Markus Viljoenmedalje vir Joernalistiek word driejaarliks toegeken vir betekenisvolle hoogstaande werk in die Afrikaanse joernalistiek, hetsy in koerante, tydskrifte, vir televisie of radio. Die medalje kan slegs een maal aan ’n persoon toegeken word.
Protea Boekhuistoekenning
Die prys word jaarliks toegeken en roteer tussen ’n ongepubliseerde magisterverhandeling, ongepubliseerde doktorale proefskrif en ’n gepubliseerde boek in Afrikaans oor geskiedenis of kultuurgeskiedenis.
In 2023 kan die prys toegeken word vir die beste magisterverhandeling (verhandelinge van persone wat in die voorafgaande drie jaar ’n graad ontvang het, kom in aanmerking).
Sluitingsdatum vir nominasies vir hierdie prys: 20 Januarie 2023
Erepenning vir Geesteswetenskap en Kuns
Die Erepenning word toegeken vir ’n persoon se skeppende bydrae tot die ontginning, organisasie en volgehoue uitbouing van die geesteswetenskappe en die suksesvolle toepassing daarvan in breër verband, soos in landsbelang. Dit kan ook toegeken word vir prestasie in die kunste (visuele en uitvoerende kunste). Die erepenning mag meer as een maal aan dieselfde persoon in dieselfde afdeling toegeken word.
Jacques van der Elstprys
Die prys word toegeken vir die beste artikel wat gedurende 2022 in die Tydskrif vir Geesteswetenskappe gepubliseer is.
Natuurwetenskappe
MT Steynprys vir Natuurwetenskappe
Die prys word beskou as die topprys vir natuurwetenskap en tegnologie en kan daarom net een maal aan ’n persoon toegeken word.
Die prys word jaarliks toegeken aan ’n persoon wat ’n betekenisvolle bydrae gelewer het tot die ontginning, organisasie en volgehoue uitbouing van die natuurwetenskappe en/of die tegnologie (of ’n vertakking of vertakkings daarvan) en die suksesvolle toepassing daarvan in breër verband, soos in landsbelang.
Dit sal ’n sterk aanbeveling wees indien ’n kandidaat naas hoëgehaltepublikasies (patente, en dergelike) ook bewys lewer van die bevordering van sy/haar vakgebied in Afrikaans. Dit kan onder meer inhou: studieleiding; redaksionele werk in Afrikaans; populêre bydraes in die media; optredes by kongresse of seminare; bereidheid om werk in Afrikaans te laat vertaal, ensovoort.
Havengaprys
Die Havengaprys is ’n jaarlikse prestigeprys wat toegeken word vir oorspronklike navorsing op natuurwetenskaplike en/of tegniese gebied en kan net een maal aan ’n bepaalde persoon toegeken word.
Die belangrikste vereiste by die beoordeling van kandidate is navorsingspublikasies.
Dit sal ’n sterk aanbeveling wees indien ’n kandidaat naas hoëgehaltepublikasies (patente, en dergelike) ook bewys lewer van die bevordering van sy/haar vakgebied in Afrikaans. Dit kan onder meer inhou: studieleiding; redaksionele werk in Afrikaans; populêre bydraes in die media; optredes by kongresse of seminare; bereidheid om werk in Afrikaans te laat vertaal, ensovoort.
Die vakgebiede roteer jaarliks en in 2023 kan die volgende vakgebiede in aanmerking kom vir die prys: Navorsing op lewende materiaal, die mens uitgesluit, bv. in die landbou-, biologiese, veeartsenykundige wetenskappe, ensovoorts).
Erepenning van die Fakulteit Natuurwetenskap en Tegnologie van die SA Akademie
Die Erepenning word toegeken vir ’n persoon se skeppende bydrae tot die ontginning, organisasie en volgehoue uitbouing van die natuurwetenskappe en/of die tegnologie (of ’n vertakking of vertakkings) en die suksesvolle toepassing daarvan in breër verband, soos in landsbelang.
Die erepenning mag meer as een maal aan dieselfde persoon in dieselfde afdeling toegeken word.
Junior Kaptein Scott-gedenkmedalje
Die prys kan jaarliks toegeken word aan studente wat reeds ’n M.Sc.-graad verwerf het in die voorafgaande twee jaar vir die beste verhandeling ingedien by ’n Suid-Afrikaanse universiteit, om die beurt in die dierkundige of plantkundige wetenskappe.
Die verhandeling moet ’n bydrae tot wetenskaplike kennis lewer en moet bewys van oorspronklike navorsing lewer.
Elke universiteit word tot die insending van een verhandeling beperk. Verhandelinge in elektroniese formaat word aanvaar.
Douw Greeffprys
Die prys word toegeken vir die beste artikel wat gedurende 2022 in die SA Tydskrif vir Natuurwetenskap en Tegnologie gepubliseer is.
Kunste
SA Akademieprys vir Drama
Die prys is een van die toppryse van die Akademie op die gebied van die kunste en word toegeken vir ’n betekenisvolle bydrae tot drama in Afrikaans en kan daarom slegs een maal aan ’n persoon toegeken word.
Die prys word driejaarliks toegeken vir dramawerk in Afrikaans in die wydste sin: Radiodrama; toneel- en verhoogkuns; rolprent en TV (akteurs, regisseurs, vervaardigers, ensovoorts).
Deleen Bekkerprys vir die beste draaiboek in Afrikaans
Die prys kan jaarliks toegeken word en in 2023 kom TV-draaiboeke vir Afrikaanse drama aan die beurt:
TV-draaiboeke (hetsy ’n enkel drama of een episode uit ’n reeks) wat in die voorafgaande drie jaar gebeeldsend is, kom in aanmerking vir die toekenning.
Literêre pryse
(Slegs boeke wat deur uitgewers voorgelê word, word beoordeel)
Hertzogprys vir Poësie
Die prys is beperk tot oorspronklike bellettristiese werk in Afrikaans en word jaarliks om die beurt toegeken vir prosa, poësie en drama in dié volgorde. In 2023 kom poësie aan die beurt.
Eugène Maraisprys
Die toekenning van hierdie prys word jaarliks oorweeg vir ’n eerste of tweede bellettristiese Afrikaanse werk van ’n skrywer in enige genre.
Akademieprys vir Vertaalde Werk
Die toekenning van hierdie prys word driejaarliks oorweeg vir vertalings in Afrikaans van bellettristiese werk uit enige ander taal.
By die beoordeling van die vertaling word gelet op die aansien wat die vertaalde werk binne die eie letterkunde geniet én op die juistheid en gehalte van die vertaling.
LW Hiemstraprys vir Niefiksie
Die toekenning van hierdie prys word driejaarliks oorweeg vir ’n oorspronklike niefiksiewerk in Afrikaans wat nie beperk is tot die vakspesialis nie.
CL Engelbrechtprys vir Letterkunde in Afrikaans
Die prys roteer tussen ’n gepubliseerde Afrikaanse letterkundige werk en ’n taalwetenskaplike publikasie/produk wat oor en/of (by voorkeur) in Afrikaans op taalwetenskaplike terrein gepubliseer of vrygestel is.
In 2023 kom letterkundige werk aan die beurt. Wenners van die Hertzogprys en die LW Hiemstraprys vir niefiksie wat pryse ontvang het binne die voorafgaande vyf jaar wat die CL Engelbrechtprys toegeken word, kom in aanmerking.