Die ATKV-Woordveertjies 2019 in beeld

  • 2

Op Vrydag 6 September 2019 het die ATKV weer hulle vere gepof en met onderbeklemtoonde swier die Woordveertjies vir 2019 aangebied, ’n geleentheid waartydens woordkunstenaars in ’n verskeidenheid kategorieë vereer en bekroon word.

Die ATKV-Woordveertjies is vanjaar vir die twaalfde keer aangebied. Die geleentheid is gehou in die Adam Small-teater te Stellenbosch.

Voor die deure oopgemaak het, is gaste bederf met happies en keurige rangskikkings van brood en groente.

Mense in blink klere kon gesels en rustig glasies klink voor die glansgeleentheid afgeskop het.

In die teater is gaste begroet deur Lyntjie Jaars, die gasvrou van die aand.

Jaars is bygestaan deur studente van die US se dramadepartement wat deel is van die produksie Jakkels en wolf onbeperk.

Die stuk is nie volledig opgevoer nie, maar grepe daaruit het die gaste vermaak.

Die drama is oorspronklik geskryf deur Malan Steyn en die lirieke is deur Frazer Barry.

Barry en sy ensemble, Tribal Echo, was op die verhoog om die musiek te verskaf.

Die wenners van die ATKV-Kinderboektoekennings, ’n kategorie waar die kinderlesers self vir hulle gunstelingboeke en -illustrasies stem, is eerste aangekondig.

Jaco Jacobs is drie maal bekroon.

Voorleeskategorie graad RR – 1, skrywer Jaco Jacobs vir Die dag toe Ernst ’n ertjie geëet het (LAPA Uitgewers).

Selfleeskategorie graad 2 – 3, skrywer Jaco Jacobs vir Spaghetti tussen jou tone (LAPA Uitgewers).

Selfleeskategorie graad 4 – 5, skrywer Jaco Jacobs vir Max die masjien (LAPA Uitgewers).

Voorleeskategorie graad RR – 1, illustreerder Johann Strauss vir Die dag toe Ernst ’n ertjie geëet het (LAPA Uitgewers). Johann kon nie by die geleentheid wees nie, so sy prys is deur Marieta Nel van LAPA se skolespan in ontvangs geneem.

Selfleeskategorie graad 2 – 3, illustreerder Alex van Houwelingen vir Spaghetti tussen jou tone (LAPA Uitgewers).

Selfleeskategorie graad 4 – 5, illustreerder Stephen Wallace vir Max die masjien (LAPA Uitgewers).

Selfleeskategorie graad 6 – 7, skrywer Celeste Slabber-Loriston vir Jinx (Protea Boekhuis).

Selfleeskategorie graad 8 – 10, skrywer Fanie Viljoen vir Veldiep (Tafelberg).

Die prys vir ’n liefdesroman is toegeken aan Uit die bloute deur Chanette Paul (LAPA Uitgewers).

Die prys vir Romanses is gewen deur Blameer die skoenlapper van Elsa Winckler (Romanza).

Philip Rademeyer het die prys vir ’n Dramateks gewen vir Klippe wat val.

Die Woordwystoekenning vir woordeboeke en taalgidse is toegeken aan die Pharos Afrikaansgids (2018), uitgegee deur Pharos Woordeboeke. Die samesteller is Nicol Faasen.

Die prys vir Niefiksie is gewen deur Petrovna Metelerkamp (middel) vir haar biografie Ingrid Jonker (Penguin Random House). Hier is sy saam met Lyntjie Jaars en Elmari Rautenbach wat die prys oorhandig het.

Die prys vir Spanningslektuur het gegaan aan Prooi deur Deon Meyer (Human & Rousseau).

Diana Ferrus het die prys vir Poësie oorhandig aan Pieter Odendaal vir sy bundel Asof geen berge ooit hier gewoon het nie (Tafelberg). Odendaal het in sy toespraak verwys na die geweld wat teen vroue, minderjariges en minderhede gepleeg word. Hy het gesê dat hy as woordkunstenaar al geleer het dat woorde belangrik is, maar stilte ook. Daarom het hy ’n minuut van stilte gelei in plaas van om ’n lang toespraak te lewer.

Die ATKV-Prosaprys is toegeken aan Die dao van Daan van der Walt deur Lodewyk G du Plessis (Tafelberg). Oud-regter Andries Buys, wat die boek onder ’n skuilnaam geskryf het, was self daar om die prys te ontvang.

Die Toekenning vir Leesbevordering het vanjaar aan die Du Toitskloof Fairtrade Mobiele Biblioteek en Mediasentrum gegaan. Du Toitskloof en Fairtrade bedryf ’n mobiele biblioteek wat agt werksdae in ’n tweeweekperiode boeke, rekenaars en internettoegang verskaf aan die kinders van plaaswerkers wat glad nie iets met Du Toitskloof te doen het nie. Dié boeklorrie doen ook een maal elke tweede week aan by die spogskool wat sorg vir die kinders van Du Toitskloof se werkers. Marius Swart, die hoof uitvoerende beampte, het die prys in ontvangs geneem.

Hettie Scholtz het daarna die verhoog betree om ’n spesiale Woordveertjie aan te kondig, dié Veertjie het gegaan aan Leonie van Rensburg.

Leonie van Rensburg, stigter en eienaar van Graffiti Boeke, is vereer vir haar passievolle toewyding aan Afrikaanse boeke en skrywers. Haar haas ongeëwenaarde kennis van die plaaslike boekemark bring lesers en Afrikaanse boeke nie net binnelands nie, maar regoor die wêreld by mekaar uit.

Ná die tyd het verskeie mediaspanne en fotograwe nog met die wenners gesels.

  • 2

Kommentaar

  • Avatar
    Riana Rothero

    Wat n wonderlike aand! Geluk aan al die wenners, maar ook aan elkeen wat op die kortlys was. .

  • Avatar
    Johlette de Jager

    Geloof in die toekoms van die taal, Hoop vir die voortbestaan, en Liefde vir en deur die taal is deur AL die deelnemers aan die besondere geleentheid bewys. GELUK en doen so voort.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top