Die Afrikaanse Taalraad vier Erfenisdag met ’n riel en ’n saampraat op ’n hoë noot!

  • 0

Die Afrikaanse Taalraad (ATR) hou vir die eerste keer ’n nasionale taalberaadfees by die Kunstekaap-teater op Erfenisdag, 24 September, om die ryk, gedeelde erfenis van die  en kultuur taal te vier. Die taalpskop geskied ook teen die agtergrond van Afrikaans se 90-jarige bestaan as amptelike taal.

Die dag is propvol met interessante gesprekke en debatte rondom Afrikaans as taal in Suid-Afrika, musiek en sang in Afrikaans en daar gaan selfs in Afrikaans geëet en gedans word!

Vroegmôre kan luisteraars van die gewilde RSG-program Praat Saam, kom luister wanneer Lynette Francis aan haar gaste vra wat Afrikaans se rol is in die smee van ’n gedeelde erfenis. Saam met haar is Steward van Wyk (Departement Afrikaans, UWK), Fatima Allie (koskenner en storieverteller uit die Bo-Kaap, Conrad de Kock (Pendoring-wenner: kopie), Martin Dentlinger (taalstryder van Rehoboth, Namibië) en Anne-Marie Beukes (ATR-voorsitter en hoof van die Departement Linguistiek, UJ). Die gesprek begin om 8:00 en sal direk op RSG uitgesaai word.

Kaapstad se eerste burger, Patricia de Lille, en Jacques van der Elst, uitvoerende hoof van die ATR, is daarná aan die woord om die vieringe in perspektief te stel.

Van 9:30 tot 11:00 gaan daar weer lekker gesels word, hierdie slag oor Afrikaans nóú. Onder leiding van Anne-Marie Beukes gaan Fahrid Essack (hoof van die departement religieuse studies, UJ), Saartjie Botha (uitvoerende hoof van die Woordfees, US), Tony Ehrenreich (Cosatu-leier in die Wes-Kaap) en Leon Wessels (UV en NWU), gesels oor waar Afrikaans nou staan, en hoe verskillende groeperinge in die land Afrikaans, as spreektaal, ervaar.

Maar wat van die toekoms? Afrikaans van nóú af is die onderwerp wat om 11:15 tot 12:45 te berde bring. Debra Meyer (dekaan van die fakulteit Natuurwetenskap, UJ), Cerneels Lourens (prokureur en taalaktivis) en Marlene le Roux (waarnemende hoof van Kunstekaap en onder-voorsitter van die Stigting vir Bemagtiging deur Afrikaans) gaan in die kristalbal kyk. Michael le Cordeur (departement van taalonderrig, US en voormalige ATR) voorsitter  sal die gesprek lei.

Dan eers asemskep wanneer Sarah Theron en Hemelbesem nuwe lewe in die partytjie kom blaas. Kom luister hoe hierdie twee besonderse kunstenaars met Afrikaans toor – en selfs probeer om mekaar se styl na te boots!

’n Gratis middagete word om 13:30 bedien.

Al ooit gewonder hoe dink die jonger geslag oor Afrikaans? Skuif dan om 14:30 nader vir ’n gesprek oor Afrikaans se jong stemme. Karen Meiring (kykNET hoof) gaan gesels met dié mense wat Afrikaans in die toekoms moet indra. Christina Mashobane (ATKV) en Sinki Mlambo (Revlon) is tweede- of derde taal Afrikaanssprekers. Saam met hulle tree op Benjamin Bock (ATKV), Mischke le Cordeur (Protea Hotel-groep), Marius Swart (departement Afrikaans en Nederlands, US) en Dian Wessels (Sunflood Studios). Hierdie klomp jongmense gaan hul perspektief stel vanuit hul werks- en leefomgewing.

En nou is dit genoeg gepraat! Om 17:00 kan belangstellendes naderstaan vir ‘n gratis vertoning deur die Betjies van Betjieskraal. Hierdie rieldansers ken hulle storie en stoftrap en hoogtrap is tweede natuur. Ook op die verhoog is die Jaloersbokkies, wat Kaapse musiek soos Taliep Petersen dit gewild gemaak het, laat hoor. Die Kaapse Affodille is ’n dames-boereorkes en hulle speel almal balke toe! Die ERUB-kinderkoor bring jong stemme van die groter Kaapsevlakte byeen en wys wat gedoen kan word wanneer ouers en onderwysers moeite doen om hul kinders uit die strate en weg van moeilikheid te hou.

Die enigste geleentheid van die dag wat jou ‘n ietsie uit die sak gaan jaag, is die vertoning Zoid. Zanne. Zolani. Drie van ons voorste vroue-kunstenaars span hul kragte saam en beloof om hul gehoor se asems weg te slaan. Karen Zoid, rockmusikant en TV-aanbieder, Zanne Stapelberg, operasanger, en Zolani Mahola, voorsanger van Freshleyground, sluit hierdie feestelike Afrikaanse dag af met musiek wat jou sal trots maak om Afrikaans in Suid-Afrika te wees! Kaartjies kos R180 en is te koop by Computicket.

Tussendeur is daar twee uitstallings wat ’n besoek werd is: Die Burger se reeks spotprente wat  die 100-jarige bestaan van dié koerant vier, en ’n versameling stalletjies wat aan die leefwêreld van Afrikaans vorm gee!

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top