Loammi Wolf het ’n doktorsgraad in publiekreg en regsfilosofie aan Unisa behaal. Sy het verder ook in die VSA (Virginia) en Duitsland (Heidelberg en Frankfurt) studeer. Aanvanklik het sy op die gebied van menseregte gespesialiseer. Sy is toegelaat as advokaat aan die Hooggeregshof van Suid-Afrika. Nadat sy aan die regsfakulteit van die Universiteit van die Witwatersrand verbonde was, het sy na Duitsland geëmigreer en die rigting van belastingreg ingeslaan. In 2008 het sy die inisiatief Democracy for Peace gevestig in ’n poging om die regstaat in Suid-Afrika deur navorsing te help sterk. Die fokus van haar navorsing was sedertdien hoofsaaklik op staatsorganisasiereg. Sy stel ook belang in hoe die verlede hanteer en/of geïnstrumentaliseer word om traumatiese gebeure van die verlede te verwerk of te versterk. Haar navorsing kyk spesifiek ook na die epigenetiese invloed van xenofobie en hoe dit die proses van demokratisering beïnvloed.