ATKV vereer joernalistieke uitnemendheid

  • 0

Die ATKV-Mediaveertjies, reeds vir meer as ’n dekade die mees vooraanstaande  Afrikaanse mediatoekenningsgeleentheid, het vanjaar ’n splinternuwe baadjie aangetrek met ’n nuwe beoordelingsformaat asook die aanlyn bekendmaking van die wenners.

Sonél Brits, besturende direkteur van die ATKV-MSW, sê dis noodsaaklik om die media te vereer, en vanjaar – te midde van die Covid-19-pandemie – soveel te meer.

“Ons het die afgelope paar weke opnuut bewus geword van die kritieke rol wat die media ook in tye van krisis en uitdaging speel. Dit is die media wat ons ingelig hou; ons opvoed oor alle aspekte van onder meer die pandemie, nie slegs plaaslik nie, maar ook internasionaal; en wat vermaak, iets wat veral nou broodnodig is.

“Ons salueer die hele spektrum van die media, en veral ons 2020-wenners. Julle uitstaande bydraes verdien verering en erkenning. Doen so voort!”

Brits het ook aangekondig dat die ATKV later in die jaar ’n spesiale toekenning vir uitsonderlike joernalistiek rakende die Covid-19-pandemie sal toeken.

Vyf beoordelaars is vir elk van die kategorieë (LEES, LUISTER, KYK) aangewys wat uitnemende werk geïdentifiseer en benoem het.

Die ATKV het vanjaar ook twee LEWENSBYDRAE-toekennings gemaak aan die veteraan radio-omroepers, Nic de Jager en Margot Luyt.

Nic de Jager verdien verering vir 50 jaar se uitsonderlike talent, voordragte, radiospel, nuuslees en aanbieding, maar veral vir sy fenomenale kennis van opera, in Nic se Goed, wat Sondae om 12:00 op RSG uitgesaai word.

Hierdie elegante, soepel aanbieder se taalvaardigheid, sy kennis van die letterkunde, musiek en kunstenaars, sy goeie smaak en oordeel, maak van hom ’n  formidabele speler, opsteller en aanbieder – die soort maestro wat jong en ou kunstenaars kan lei en inspireer.

Nic de Jager is gemaklik en gemoedelik wanneer hy uitsaai en hy gebruik sy uitsonderlike stem om van elke program ’n besondere genotvolle luisterervaring te maak. 

Margot Luyt is al sedert 1978 betrokke by radio én televisie.

Sy het oor die jare ’n baie groot rol gespeel in die voortbestaan en verbetering van dramas en vervolgverhale vir die radio, nie net as regisseur nie, maar ook met die opleiding wat sy deurgaans aan regisseurs en spelers verskaf het.

Margot Luyt se vermoë om met mense te werk en haar kennis op só ’n manier oor te dra dat dit die uitsaaiproduk voortdurend bly verbeter, is uitsonderlik. Sy het veral ’n groot bydrae gelewer om die Afrikaans digkuns en skryfkuns op die radio te laat lewe, hoofsaaklik deur haar professionele aanbieding en haar keurige versorging van programme oor poësie en letterkunde.

Die bydrae wat sy gelewer het om die kollig op gevestigde en ervare digters en skrywers te laat val én nuwe Afrikaanse stemme bekend te stel, kan nie onderskat word nie.

Die wenners in die kategorieë LEES, LUISTER, KYK is soos volg:

LUISTER

Die beoordelaars in hierdie kategorie was: Bettie Kemp, Margot Luyt, Willemien Marais, Dawid van Lill en Leon van Nierop.

  • Joanie Combrink, regisseur van Man van Cirene – RSG
  • Elize Cawood vir haar voorlesing van Stralejakkers – RSG
  • Pietie Beyers vir sy vertolking in Blikslim – RSG
  • Kobus Burger, uitvoerende regisseur van drama – RSG
  • Lynette Francis, aanbieder van Praat Saam – RSG
  • Frieda van den Heever, samesteller en regisseur van Voetsoldaat van die vers – RSG

LEES

Die kategorie LEES se beoordelaars was: Joan Kruger, Carryn-Ann Nel,

Elmari Rautenbach, Kirby van der Merwe en Herman Wasserman.

  • Anneliese Burgess vir “’n Pad kronkel deur tyd en kom tot rus by ’n familiegraf op Koesberg” en “Plaasmoorde: Die skimme van geweld wat ons harte oopkloof” – Vrye Weekblad
  • Nathan Trantraal vir verskeie artikels, meningstukke, essays en “Hyper byrie Food Lovers Market” – Rapport
  • Marida Fitzpatrick vir “Vat hom, Bulldog” – Insig
  • Hannelie Booyens vir “Om te hoor jy’t Joost se siekte” – Insig
  • Dominique Botha vir “Gerugte van Rian” – Insig
  • Karin Brynard vir “Stil, broers, daar gaan ’n ... man verby” – Insig
  • Willemien Brümmer vir “Plaasaanvalle: Die misdaad wat wit én swart laat bloei” – Netwerk24

KYK

Die AKTUELE GENRE is beoordeel deur Gielie Hoffman, Mariëtta Kruger, Crystal Orderson, Harald Pakendorf en Bettina Wyngaard.

  • Lourensa Eckard as aanbieder van kykNET Verslag en kykNET In Gesprek – kykNET
  • Kabous Meiring as aanbieder van Prontuit en Megaboere – kykNET
  • Berdene & Janhendrik Burger as vervaardigers van Edik van Nantes, seisoen 3 – kykNET & Kie
  • Ivor Price as aanbieder van Landbouweekliks – VIA

Die VERHALENDE GENRE is beoordeel deur Diane de Beer, Jeff Dirks-Korkee, Cornelia Faasen, Ilza Roggeband en Réney Warrington:

  • Monique Rockman vir haar vertolking van die rol Beatrice Mack in Die Spreeus – kykNET
  • Jorrie van der Walt as kinematograaf van Dwaalster én Die Spreeus – kykNET
  • Carla Smith vir haar rol as Kitty in Tydelik Terminaal – kykNET
  • Rocco Pool vir produksie- en stelontwerp vir Dwaalster én Die Spreeus – kykNET
  • Erica Wessels vir haar rol as Ragel-Lee in Dwaalster – kykNET
  • Chris Vorster vir sy vertolking van Bas Koorts in Die Spreeus – kykNET
  • Albert Maritz vir sy spel as Frans Loots in Dwaalster – kykNET
  • Tarryn Wyngaard vir haar rol as Gina Devine in Dwaalster – kykNET
  • Anna-Mart van der Merwe vir haar vertolking van Julie in Tydelik Terminaal – kykNET
  • Lea Vivier vir haar rol as Lilani du Toit in Fynskrif 2 – kykNET
  • Pierre-Henri Wicomb vir die klankbane van Dwaalster én Die Spreeus – kykNET
  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top