Akademiepryse 2017: Eugène Maraisprys vir poësie aan Bibi Slippers – commendatio

  • 0

Wessel Pienaar, Bibi Slippers en Andries Visagie
Foto: Naomi Bruwer

Die Eugène Maraisprys vir poësie is aan Bibi Slippers toegeken vir haar bundel Fotostaatmasjien.

Huldigingswoord: Andries Visagie

Bibi Slippers is kennelik ’n digter wat met uitbundigheid diep teug aan die genot wat die digkuns bied. Fotostaatmasjien laat ’n vars eietydse indruk sonder dat beproefde verstegniese stategieë in die wind geslaan word. Slippers gaan op ’n verfynde manier met emosie in haar gedigte om en dis onder meer danksy die verfrissende humor dat hierdie sprankelende bundel vir lesers ure van genot besorg. Soos die bundeltitel Fotostaatmasjien suggereer, gaan dit hier oor die status van die kopie, van die vertaling, van die weergawe, van die duplikaat wat tegnies selde ’n lewensgetroue nabootsing van die oorspronklike is. Die tegniese versteurings bring verskuiwings in die betekeniswaarde van woorde en artefakte mee. In die geslaagde gedigreeks “Alpha Xerox: Die eerste fotostaatmasjien” word die skepping van die heelal byvoorbeeld in terme van fotostate op ’n geestige manier herverbeel.

Die klankvernuf van die digter word in ’n gedig soos “Ondersoek na die aard van obsessie met spesifieke verwysing na die polkakol-kunswerke van Yayoi Kusama” goed gedemonstreer en die vindingrykheid waarmee Bibi Slippers kategorieë oorskry, lei tot hoogtepunte soos byvoorbeeld die aforistiese gedig “Die resiesfiets en die reier”. Die liefdesgedigte in die bundel belig die tipiese verhoudingsprobleme waarmee geliefdes te kampe het, maar die eietydse tegnologie sorg in sommige gevalle vir die nuwe formate waarin die liefdeskwellinge hulleself aanmeld.

Dit is opwindend om die werk van ’n digter te lees wat nie daarvoor terugdeins om die nut van eksperiment in die poësie na waarde te skat nie. Fotostaatmasjien is boonop visueel treffend uitgegee en die aweregse aansluiting by die popkultuur (byvoorbeeld die musiek van Taylor Swift) lei tot ’n gawe poëtiese eindproduk wat vermoedelik ook by jonger lesers sal aanklank vind.

Voorsitter, ek versoek u om die Eugène Maraisprys aan Bibi Slippers te oorhandig vir haar digbundel Fotostaatmasjien.

Stellenbosch
Junie 2017

Lees die LitNet Akademies-resensie-essay van Fotostaatmasjien deur Jaco Barnard-Naudé.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top