Litnet

Titel: Homoseksualiteit – ’n studie deur die ouers van ’n gay seun
Skrywer: Geoff en Eileen Stenekamp
ISBN: 9781920654122

Koop Homoseksualiteit – ’n studie deur die ouers van ’n gay seun by Kalahari.com.

Geoff en Eileen Stenekamp het ’n boek geskryf met die titel: Homoseksualiteit - ’n studie deur die ouers van ’n gay seun. Wat sê die wetenskap? Wat sê die Bybel?

Hulle vertel vir Naomi Meyer van hulle reis saam met hul kind deur die jare. En van ’n boek wat baie mense gaan laat regop sit en dalk vir nóg meer mense iets sal kan beteken.

Geoff, jy en jou vrou Eileen het pas ’n boek geskryf oor julle gay seun. Wie se idee was dit?

Soos wat mense die onderwerp van homoseksualiteit vermy het, het dit vir Eileen aan die spreekwoordelike olifant in die sitkamer herinner. Die olifant is daar, maar niemand praat daaroor nie. Sy het die boek eintlik as ’n brief aan vriende begin, vriende en familie wat oortuig is dat ons verkeerd is in die aanvaarding van die feit dat ons seun gay is, en dat ons hom moet oortuig om ’n gay-“leefstyl” af te sweer. Met bykomende inligting en uitbreiding van ons punte het ons die brief verander in ’n dokument, en die dokument het oor een en ’n halwe jaar ’n boek geword.

Op watter stadium het jul uitgevind jul seun is gay en op watter stadium het julle die boek begin skryf?

Hy het dit op die ouderdom van 21 aan ons openbaar, alhoewel ons toe reeds die vermoede gehad het. In die tyd hierna het Eileen se gedagtes teruggegaan na gebeurtenisse oor die jare en het sy besef dat die tekens van kleins af daar was. Eileen het niks hiervan ooit as verkeerd gesien nie, of as tekens van gay-wees vermoed nie; sy het slegs gedink dat dit is hoe hy is. Nadat ons ongeveer tien jaar se navorsing op die gebied van die Bybel sowel as die wetenskap gedoen het, het ons met die boek begin.

Wat dink julle veroorsaak dat baie mense negatief reageer op gay-wees?

Mense word van hul kinderjare af deur hulle ouers ingeprent dat homoseksualiteit verkeerd en sondig is. Wanneer dit iemand nie persoonlik aangaan nie, soos dat hulle nie ’n kind of broer of suster het wat gay is nie, word hulle nie, soos ons, gedwing om dieper na die hele aangeleentheid te kyk nie. Mense verstaan dikwels nie dat gay-wees nie ’n keuse is nie, en indien hulle dink dis nie ’n keuse nie, verwag hulle dat so ’n persoon selibaat moet leef. Die vraag by ons is dan: Sou jy as heteroseksuele persoon bereid wees om selibaat te leef? Dit word van priesters in sommige gelowe verwag, wat uitloop op baie geknyp van katte in die donker, juis omdat die seksuele drang, sowel as aggressie, die sterkste menslike drange is, aldus Sigmund Freud.

Julle seun is ’n komplekse mens met ’n verskeidenheid eienskappe. Waarom op die gay-aspek fokus?

Hy is ’n pragtige mens, ’n hoogs intelligente mens, sosiaal deur almal geliefd, uiters suksesvol in sy beroep. ’n Totale ekstrovert. Ons as ouers wou die hartseer van verwerping en marginalisering verhoed en hom die geleentheid gun om sy potensiaal as mens met volle oorgawe uit te leef.

Hoe betrokke was julle seun by die skryf van die boek en hoe voel hy daaroor?

Ons seun is baie opgewonde oor die boek. Hy kry amper daagliks te doen met gay mense wat tou opgegooi het met kerke, dominees, pastore en geloof oor die algemeen, omdat hulle al so baie verwerp en weggegooi is – beide deur die kerk en sy lidmate, maar ook deur hul ouers, wat vinnig in onkunde die Bybel voor hul gesigte hou. Hy was nie “hands-on” by die boek betrokke nie. Die rede hiervoor is dat hy nie graag wou inmeng nie, aangesien die boek uit die oogpunt van ’n ouer geskryf is. Hy het met liefde raad en insig gegee wanneer dit verlang was, maar het homself op ’n gesonde afstand gehou om ons as sy ouers kans te gee om die feite oor te dra soos ons dit bekom het.

Dink julle daar is baie mense in die land wat nie openlik gay is nie omdat hulle voel hul gaan nie aanvaar word nie?

Ja beslis, maar ons mening is dat minder mense dit onderdruk of probeer wegleef deur heteroseksueel te probeer leef. Gay persone besef hulle kan nie vir ewig ’n leuen leef, en daardeur ander mense, soos ’n vrou en kinders, se lewens verwoes nie. Wat kerkgang betref, alhoewel die kerk haar benadering tot gays al versag het, voel gay persone nie daar welkom nie, as gevolg van die reaksies deur sommige van die lidmate. Die gemeentelede leef nie die besluit van die kerk ten opsigte van homoseksualiteit uit nie. Die praat van die kerk en die dade van die gemeentelede is nie twee verskillende goed nie.

Julle het baie navorsing gedoen oor die oderwerp. Wat was julle interessantste bevinding?

Vir Geoff was die interessantste die feit dat homoseksuele gedrag algemeen onder diere voorkom. Vir Eileen was dit openbarend dat homoseksualiteit, nes Downsindroom, ’n afwyking van chromosoom x kan wees. Downsindroompersone word met groot liefde en deernis aanvaar, maar gays word merendeels deur die gemeenskap verwerp. Albei godgeskape. Hoekom die verskil in hantering? ’n Kind kies nie om met Downsindroom gebore te word nie; so ook kies ’n gay persoon nie om homoseksueel te wees nie.

Waarom dink julle koppel baie ouers dit aan een van die drome vir hulle kinders: ’n man, vrou, kinders, ’n toekomstige gesin? Het julle dit self ook so gevisualiseer?   

Ons het beslis gevisualiseer dat ons seun met ’n oulike meisie sou trou en nog oulike  kinders sou hê. Dit was egter glad nie ’n groot ding om te moes aanvaar dat dit nie gaan gebeur nie. Mens maak dadelik daarmee vrede, sekerlik omdat ons twee heteroseksuele kinders ook het, wat nie noodwendig alle ouers gegun is nie. Jy as ouer moet dit aanvaar, dis onveranderlik. Die pluspunt hier is dat ons geweet het dat alhoewel daar op daardie tydstip nie ’n spesiale persoon in sy lewe was nie, ons definitiewe vertroue gehad het in sy keuse van vriende, en dus ook in die keuse van ’n lewensmaat die regte oordeel sou toepas.

Wat ondervind julle in die kerk as julle met mense oor julle navorsing gesels?

Mense wat anders voel, plaas jou onder ’n geweldig vinnig polsende preek om jou so gou moontlik te probeer anders oortuig. Ander, weer, keer hul gesig in ’n ander rigting en is hoegenaamd nie bereid om die onderwerp te bespreek nie. Dankie tog dat daar baie mense is wat meer ingelig is en met groot simpatie en inskiklikheid saampraat.

Sou ’n Bybelstudiegroep hierdie boek kon koop en daaroor in ’n groep gesels?

Ja, beslis. Die boek bied ’n gulde geleentheid vir sel- en Bybelstudielede om meer van die wetenskap oor homoseksualiteit te lees, sowel as om aktief te debatteer oor die gevolgtrekkings waartoe ons, die skrywers, gekom het.

Sou ’n ateïstiese persoon wat om enige ander rede die boek wou koop, ook aanklank kon vind by jul benadering?

’n Hele gedeelte word aan die wetenskaplike bevindings gewy en dit behoort op sigself rede genoeg te wees om die boek te lees – om te leer wat presies wetenskaplikes oor die wêreld heen se bevindings in hul navorsing oor die onderwerp is. Is dit aangeleerde gedrag? Kan dit afgeleer word? Is diere homoseksueel? Is daar gay-gene in die liggaam? Verskil die brein van homoseksuele persone van dié van heteroseksuele mense? Kan homoseksualiteit in die embriostadium ontwikkel? En daar is nog baie ander vrae wat aangespreek word.

Teken in op LitNet se gratis weeklikse nuusbrief. | Sign up for LitNet’s free weekly newsletter.