Liewe Trienie
Ek sien die sneeu wat so opgestapel le voor jou sussie se huis, en ek glimlag by myself. Ja, dis harde werk om sneeu te skoffel ...
En dan word my glimlag selfs breër as ek jou woorde lees. Dis winter in die Noordelike halfrond Trienie, en daarom sneeu dit op sommige plekke. Let wel, nie eens oral in die noordelike halfrond nie, waar my broer woon, in Florida, loop hulle selfs dwarsdeur die winter met kortmou hemde en plakkies buite. En ek wil jou verseker dat die son hier by ons net so pragtig skyn, dat ons winter dae kristalhelder is met die blouste blou lug wat jy jou kan indink. Ja, dit word KOUD. Maar, dan het ek gesien dat dit die afgelope winter in SA op talle plekke ongekend koud was en gesneeu het. Ons is, in teenstelling met SA, goed toegerus vir die koue en die sneeu, en ek wil jou verseker ons is nie eens naastenby  "vasgekluis binne in ons tronk huise" nie.

Ons gaan klap 'n toon in ons pragtige sneeulandskap, ons ski, ons verkyk ons aan die kindertjies wat, dik toegewikkel in warm winterklere, teen hellings afjaag met hulle slees, sneeumanne bou, en sneeugevegte hou. Ons geniet die winter met sy gesellige lang aande, dik boontjiesop en varsgebakte bruinbrood, kaggelvure, en snoesige winterlakens wat jou so heerlik knus wegsus na droomland. Soms hoor ons in die middel van die nag 'n coyote huil (ja, en ek woon naby New York City, maar hier is meer kleinwild in my agterplaas as wat ek ooit in SA gesien het ....tensy ek natuurlik na 'n wild reservaat gegaan het). Hier is coyotes, jakkalse, swartbere, takbokke, wasbeertjies, eekhorings wat my birdfeeder kom beroof elke dag... die lysie hou aan en aan.....

En dan.....na omtrent drie maande se winter, word dit lente, en die skouspel slaan ons asems weg.....letterlik oornag word alles baldadig groen, die suikerbekkies daag op in ons tuine, die hasies wat oorwinter het onder die groot Azalea bos, sit nou soggens en bak in die sonnetjie met hulle twee wollerige babatjies, en die eerste groente saadjies begin ontkiem.

In die somer, wat terloops net so warm en sonnig is as enige plek in SA, kuier ons tot laat saans buite op die grasperk, of op ons deck. Ons braai 'n vleisie, en geniet die lang somersaande.....dit word eers so teen halftien donker. Ons vat ook die pad na nasionale parke en reservate en gaan beleef die talle natuurwonders wat hierdie land ons bied. Ja Trienie, Suid Afrika het nie die alleen reg op sonskyn, ongerepte natuur, en volop wild nie. Dis oral ter wereld te vinde, en mense oral ter wereld maak gebruik van die voorreg om die natuur in die somer ten volle te benut. Ons woon in 'n klein dorpie naby NYC, soos genoem, maar ons het ook 'n stukkie grond in New York State, waar ons 'n klompie boerbokke aanhou. Ja, boerbokke. Daar ruik ons ook die veld, gekneusde gras, ons hoor die stroompie murmel aan die onderpunt van ons stukkie plasie, en ons verwonder ons aan die natuurskoon om ons.

Dis oral mooi Trienie, mens moet net kyk en dit raaksien. En die son skyn ORAL. Regtig waar :)
Groete uit New Jersey
Mathilda

Ps. as ek geweet het hoe, het ek my foto van vanaand se sononder hier gepos, maar ek weet nog nie, ek is 'n beginner op hierdie bord.

Hi Mathilda,

Dankie jou brief en baie welkom hier op LitNet! Hoop jy gaan dit so baie geniet soos ek. Klink of jy my taal praat en hou ek van jou brief. As jy so aanhou oorreed jy my dalk ook om te trek! (Grappie net)

En natuurlik is jy reg - dit is wat mens van 'n plek maak wat belangrik is. En verseker skyn die son oor alle mense en oor lande heen. My doel met die briefie was om bietjie sonskyn te kon inskryf in sekere van die Netters hier wat maar negatief is oor die politiek en andere wat hul tasse wil pak.

En ja, my sussie hulle in Kanada leef hul eie vol lewe. Maar weet ek dat die verlange maar altyd daar sal wees. Stuur asb jou sonskynfoto as jy kan. Miskien moet ons LitNet vra om 'n kompetisie te hou oor die mooiste son met die mooiste stories daaraan gekoppel. Dan kan ons rerig 'brag' met ons fotos!

Liefdetjies uit SA.

Trienie 

Dag Trienie,

die hele wêreld is mooi Trienie, dis mense wat plekke lelik maak.

Shalom uit Oz

Duitswester

Die sneeu en sonskyn foto's is almal pragtig en so het die Liewe Vader voorsien vir elke mens om te bly waar hy tuis voel. Ons is tydelik woonagtig buite Oos-Londen langs die see tussen wildsplase voordar ons finaal Weskus toe verhuis.

Ek het nog net mooi sonsopkomste in my lewe gesien. Ek is net dankbaar ek het die nag oorleef. Elke oggend son wat ek sien is vir my mooi. Ek dink oom Fanus Rautenbach het een keer gesê dat wanneer hy in die bos is verlang hy na die meeu. Wanneer hy by die see is verlang hy na die spreeu. Elk land of streek het iets in die lug wat 'n "skoonheid" aan die son se opkoms gee. Ek het die son sien opkom oor die see, oor sand, oor bosse oor geboue, oor sneeu/ys. 'n Mooi sonsopkoms is wanneer jy na iemand verlang wie jy nie ken nie. Sonondergange is ook mooi.