Weggooikind
Kry jy koud vanaand?
Is jou beker vol of gaan slaap jy dors?
Blink jou maan beter as gisteraand?
Het die wêreld jou verniel?
Is jy kop omhoog in elke spieël?
Het die liefde al met jou kom mors?
REFREIN:
Weggooikind
My geskeurde lint deur die branders verslind
My deur staan oop, my hart ontbloot
'n Wieg op die kerk se trap
Soveel trane, een misstap
Weggooikind
Wolweseun in die asynreën, alleen
Kom bevry my van aardse dinge
van onbesonne beginne
En die kyke van die skinder-koninginne
Kry jy koud vanaand
so sonder papiere, sonder naam?
Blink jou maan beter as gisteraand?
Waar het jy huis gekry, hoe lyk jy nou?
Kom jy soek na my, sal jy my lank vashou?
'n Ma se blaam, vasgevang in 'n leë fotoraam
Weet jy waarvandaan jy kom?
Sou jy wou kies as jy kon vergewe?
Trek jy na hom? Ek was so jonk, bang
Nou staan die waarheid ewig, altyd verlam
Kry jy koud vanaand? Is jou beker vol of gaan slaap jy dors?
Blink jou maan beter as gisteraand?
Teken in op LitNet se gratis weeklikse nuusbrief. | Sign up for LitNet's free weekly newsletter.
Kommentaar
Hulpkreet
ek soek na myself ...
wie is ek.
wat is my identiteit.
wie is my pa
en wie is my ma?
wat is hulle name,
wat is my naam?
ek is uit ’n
hospitaal aangeneem;
maar,
waarom is ek
as pasgebore meisie
in Junie 1964
tussen struike
langs ’n gruispad versteek?
(Moses...
was ten minste versorg);
wie doen so iets?
ek was poedelnaak
en bebloed
pasgebore
in ’n bitterlike koue nag ...
so blou van die koue,
die wie my vind
dog ek is ’n bruin kind;
het jy al na jouself gesoek?
ek soek na myself
ek weet nie
wie ek is nie ...
ek vergewe my ouers
want ek is nou gekleed
maar hulle is steeds naak
voor God en die mens;
hoekom soek hulle my nie?
ek is so alleen
alleen
alleen ...
Here,
wie is ek ...?