Vrouedag-skryfkompetisie: Ystervrou

  • 0

Sy griffel net woorde, met haar pen op papier,
soos graffiti op ’n witgeverfde muur.
Dagga rook kinders en agterstallige huur.

Tweedehandse klere, sonder ontwerpersname,
klop aan die deur van die welsynsdame.
Gekraakte vensters, gebreekte rame.

Snotneus kleintjies, met modderhande,
snaakse geluide, veral in die aande.
Selfgehekelde truitjies vir wintermaande.
Tienergiere, dieremaniere en probleme met die bure.
Genade en hoop, trane wat loop, geen geld om kos te koop.

Handgeverfde kabouters in die vetplanttuin,
sonlig wat deur krake in die mure skyn,
sorge weg, met ’n glasie wyn.

Vetgemaakte kalf vir ’n verlore seun,
geen gewillige pa om op te steun.
Verskriklike droogte, sonder reën.

Die wêreld se laste, kan haar nie skeel,
dit wat sy het, sal sy ook nog deel,
partykeer suiker of ’n koppie meel.

Partykeer ’n skouer om op te huil,
of ’n kamer vir ’n weerlose om in te skuil,
soms bly leeus in dieselfde kuil.

Verlang sy soms na beter?
Wel ja, vir seker!
Gelukkig is als ’n verbygaande beker …

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top