Vrouedag-skryfkompetisie: Formidabele vrou …

  • 4

Diep in die donker nag
met die draai van die uurglas
hingel my gedagtes
in huiwerende trag
oor grense en gebeure
wat deurskif uit diep geheue.

Ek sien haar trotse houding
die sekerheid in haar raakvathande
die wankellose tred
en dapper anker staan
in die voorste linies, waar sy veg
vir selfbehoud en eie reg.

Maar, die waarheid lê verskuil in haar oë -
daar waar pyn en seerkry in stilte golf
waar magteloosheid wriemel
waar kommer kromtrek
in haar daaglikse worstelstryd
wat pêrel stoot in verborgenheid.

Haar omgeestrewe is ongekend
haar siel met liefde oordek
ʼn klein klippie in ʼn groot dam
wat wyd (tot in oneindigheid) uitkring
met ʼn wil vas en sterk
maak sy daagliks haar merk.

Dáárdie vrou weerklink in elke Marlene (le Roux), Miriam (Makeba) of Helen (Zille)
moeder, eggenoot, beroepsvrou
voorloopvrou, bymekaarhouvrou
die wêreld sien slegs die sukses
is onbewus van haar nagtelike onrus
die smeekgebede vir voorspoed en sielerus

en die wete oor wie en wat sy werklik is
wáár haar krag en hulp vandaan kom
dat môre se toekoms en sukses
geborge lê in snags se stilwees en wroeg
om bedags te kan presteer in elke uitdaging se swoeg.

Ek sien haar daagliks in menige vrou
wat daarna streef
om ʼn verskil te maak
nie net stilsit en wag
dat Gods water oor Gods akker vloei
maar self saai en arbei vir voorspoed en groei.

Viva … aan elke formidabele vrou!

  • 4

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top