Ek hou van Helen Martins
omdat sy my aan jou herinner
omdat jy my van haar vertel het
in Art History 101
en jou present vir my twenty-first
was ’n sementuil met blou glasoë
en jy het ’n gedig vir haar geskryf
"… dis snaaks dat mense
nou eers jou stil alleen
lewe ontdek het"
en ek was daardie dag baie lief vir jou.
Ek hou van Helen Martins
omdat sy anders was soos jy
van glas gehou het en van
meerminne en omdat die kamele
na Mekka staangemaak is
en omdat jou tuin in Bloemfontein
ook so vol goed was
wat jou hande gemaak het.
Ek hou van Helen Martins
omdat sy ’n kamer het met groen
glasbesmeerde mure, heldergroen soos jou Fiat
waarmee jy vir my kom kuier het
een vakansie en toe gaan staan het
langs ’n verlate mielieland
en ons het gelag en wyn
gedrink en gefilosofeer
oor Helen en haar uile en ons was saam
bang vir die donker nag.
Ek hou van Helen Martins
omdat sy my aan jou laat dink
toe jy nog geleef het.
Kommentaar
Ek hou baie van jou gedig, omdat dit so mooi visueel is. Jy het my op 'n verbeeldingsvlug geneem. Dankie
Dit is n mooi gedig wat jou presies die situasie en omgewing laat beleef deur jou woorde
Baie dankie, Riette
Waardeer jou kommentaar, Martha