Litnet

Ek was so rukkie uitlandig en het so bietjie met ander dinge besig geraak. Maar soos ’n tipiese verslaafde het ek tog so nou-en-dan ingeloer op die Sê om te kyk wat al my ou vrinne aanvang. Soos baie dinge in ons geliefde land, het niks verander nie. Jan Rap mor steeds oor Afrikaans en die politiek terwyl Dirk, Angus en Panda moedig probeer om sinvolle gesprekke met behoorlike redelikheid en wetenskaplike onderbou te voer. Die gewone koortjie van Raed-na-Gael, Kobus de klerk, FC Boot en Dolf, probeer steeds hard om Suid-Afrika se posisie as een van die lande met die mees oningeligte en onkundige bevolkings in die wêreld, in stand te hou. Angus se onlangse skrywe oor kreasionisme en evolusie het my weer aan die dink gesit en lus gemaak om weer die koortjie se moere te roer.

Een van die mees belangrike wetenskaplike ontdekkings en teorieë wat tot op hede gemaak en ontwikkel is, is die teorie van evolusie wat deur Darwin op 50-jarige ouderdom in 1859, op die tafel geplaas is. Vandag is die evolusieteorie tot vervelens toe deur direkte empiriese navorsing bevestig en uitgebrei en ontwikkel tot ’n bevestigde wetenskaplike feit en is dit in derduisende portuurgeëvalueerde publikasies ontleed en verfyn. Alle fossielvondse ondersteun die teorie en die voorspellings wat op grond van die teorie gemaak word, word telkens bevestig – soos dit ’n behoorlike wetenskaplike teorie betaam. Daniel Dennett noem die teorie in sy boek, Darwin’s Dangerous Idea, ’n universele suur wat deur enigiets sal eet. – “Darwin’s idea – bearing an unmistakable likeness to universal acid: it eats through just about every traditional concept, and leaves in its wake a revolutionized world-view, with most of the old land marks still recognizable, but transformed in fundamental ways.”

In 2009, in aanloop tot die 150-jarige herdenking van die verskyning van Darwin se epiese werk On the Origin of Species by means of Natural Selection in 1859, is die vraag aan meer as 10 000 volwassenes in 10 lande gevra, of hulle die evolusieteorie onderskryf. In Suid-Afrika, een van die tien lande, het slegs 42% van die respondente positief geantwoord, en sodoende in die 9de plek, net voor Egipte, geëindig.

Onkunde oor die wetenskap in die algemeen en die evolusieteorie in die besonder, is natuurlik die grondoorsaak van hierdie verskynsel. ’n Domastrante weiering om feite te aanvaar word gemotiveer deur ’n onrealistiese geloof in onbewysbare gode wat maar net altyd daar was. Geen bewyse nie – net geloof! Uit die aanhaling uit Daniel Dennett se boek hierbo is dit duidelik dat hierdie onlogiese optrede aangevuur word deur ’n fanatieke vrees vir die die universele suur van Darwin, wat hulle ou bekende landmerke gaan transformeer.

Vandaar die opskrif van my plasing vandag.

Groetnis
Thomas