Litnet

Dirk

Jou kommentaar onderaan my briewe van 22 Februarie het betrekking.

Dankie Dirk vir die storie oor ‘verlief neem’ en ‘vir lief neem’.  Ek het gewonder toe ek dit neergeskryf het maar ‘verlief neem’ lýk toe meer reg, gedag dit het in die volksmond al reg geword, soos ‘guur’ en ‘onguur’ wat deesdae dieselfde betekenis het.  Maar jy’s reg, ‘vir lief’ maak sin, ‘verlief’ nie.

Jy’s ook reg as jy sê dis nie moontlik om met my oor die posisie van Afrikaans te debatteer nie, want daar is geen debat in die verband nie – Afrikaans ís besig om veld te verloor en agteruit te gaan in die NSA, dis ’n voldonge feit.  Jy stem effektief daarmee saam, want jy gee redes vir die kwyn van Afrikaans, soos onder andere ‘dis 2017’ en ‘die dae dat Afrikaans die septer geswaai het is lank verby’ en die ‘posisie van Afrikaans is te wyte aan die demografie’.

Wat wel debatteerbaar is, is die aandeel van RSG en KykNET in hierdie agteruitgaan.  Jou verweer is dat daar ’n groot luister- en kykertal is en dat hierdie instansies 24 uur per dag in Afrikaans uitsaai.  Hoe is hoeveelheid mense en tyd nou ’n bewys dat daardie twee instansies nié ondermynend is nie?  Dit is juis vanweë hierdie statistiek van jou dat hierdie ondermyning so effektief is want miljoene Afrikaanssprekendes word 24 uur per dag met subliminale boodskappe gebombardeer.  Afrikaans speel tweede viool op daardie stasies; Engels word bevorder, eintlik in ons kele afgedruk.  Is dit nou bevordering van Afrikaans?  Die teenoorgestelde gebeur nóóit op Engelse stasies nie; Afrikaans word daar doelbewus vermy of openlik afgejak.

En dis nie net die radio en televisie wat Afrikaans afgradeer tot houthakkerstatus nie.  Ons eie mense doen ewe lustig mee; daar is selfs Afrikaanssprekendes wat hulle kinders in Engelse skole sit.  Ons Afrikaanse universiteite het lankal boedel oorgegee en kort-kort hoor jy predikante sê “ ... die Engels sê dit vir my so mooi ...”  Party van hulle, die dominees nou, haal sommer lang stukke Engels aan en dis nie ongewoon dat Engelse gesange in die Afrikaanse kerke gesing word nie, selfs in van die susterkerke.

Beduidend ook in hierdie verband is jou opmerking dat ek nie die arme Afrikaanse mense op die platteland moet beledig as ek sê daar is van hulle wat nie Engels kan praat of goed verstaan nie.  So dis ’n belediging vir Afrikaanssprekendes as hulle nie Engels kan praat nie?  Soos jy altyd sê, nou toe nou. 

Maar jy’s reg; vir die meeste Afrikaners is dit ’n geweldige verleentheid as hy nie kan Engels praat nie.  Ek weet nie of dit vanweë die subliminale propaganda van sekere Afrikaanse instansies (soos onder andere RSG en KykNET) of vanweë ‘n selfopgelegde minderwaardigheid is nie.  Afrikaanse mense sal byvoorbeeld Engelse woorde, as hulle Afrikaans praat, met die Engelse ‘r’ uitspreek maar Engelse mense sal nooit die Afrikaanse rol-r gebruik as hulle Afrikaanse woorde in Engels gebruik nie.  Dit klink uiters kok en gedienstig, luister maar na die omroepers.

Jy vra hoekom  “ . . .  moet Afrikaans bo-aan die Wildtuinbrosjure staan as slegs 12 persent van die RSA se bevolking Afrikaans eerstetaalsprekend is?”  Wel, hoekom Engels as slegs 9,6 % van die SA-bevolking Engels-eerstetaalsprekers is?  Terloops, ek het dit 13,5 % (2011-syfer) Afrikaanssprekend is.  So, wat ook al jou statistiek wys, dit verskaf geensins die rede vir die dominansie van Engels op die brosjures nie inteendeel, dit staaf my bewering dat dit Engels is omdat die swart owerheid dit wil hê.

Buitendien, persentasies blyk nie veel van ’n invloed te hê nie, want slegs 4,8% (Ethnologue) van die wêreldbevolking het Engels as moedertaal maar dit het hulle nie gekeer om hulle taal buite verhouding invloedryk in die wêreld te maak nie.  Engels het daardie status verwerf deur die energie, toegewydheid en ywer van die Engelsman (en net so kwyn Afrikaans weens die gebrek aan energie, toegewydheid en ywer van die Afrikaanssprekende). 

7,2% van die wêreldbevolking het ’n kennis van Engels en jy mag nou aanvoer dat 7,2% van die wêreldbevolking ’n geweldige hoeveelheid mense is en dit is wel so maar nie almal van daardie mense is toeriste nie.  Net ’n piepklein persentasie van hulle is toeriste en net ’n piepklein persentasie van húlle weer besoek Suid-Afrika en al besoek AL hierdie mense die wildtuine en parke; daar ís mos Engels op soos ek voorstel (en Duits en Frans) om hulle te akkommodeer.

Dit is ’n feit dat Afrikaans geweldig veld verloor het die afgelope 22 jaar en daar bestaan by my geen twyfel dat RSG en KykNET hier saamspeel nie.  En ten slotte, jy sê ons moet al die variante van Afrikaans omarm en ek stem saam; hoe sal mens dit nou nie wil doen nie.  Onthou net, Afrikaans deurspek met Engels is nie ’n variant nie; dis gewoon swak Afrikaans.

Groetnis

Jan Rap