Litnet

Lyk my ek het teen ‘n goue kalf se been gepie.

Die onkundige heiden weet niks van wetenskap of teologie, maar hy ondersteun die teorie omdat die elite in sy gemeenskap dit aandui en hy wil tog nie “uit” wees nie.

Dit verg diep boosheid om ‘n leuen op te dis en dan die bewyse daarvoor te vervaardig, vir die evolusie-teorie sowel as die klimaat-vrees. Lg word nog gebruik om die populasie verder te belas ook nog, op so ‘n manier dat hulle bly is daaroor. Daar is ‘n gesegde dat diplomasie die kuns is om ‘n man te sê om hel toe te gaan op so ‘n manier dat hy uitsien daarna. Onlangs was die “eye-blind” die Aids gevaar. Dit trek nie meer aandag nie en tans is daar nog ‘n bietjie “mileage” in die “Global Warming” klug, alhoewel dit op ‘n paar plekke begin uitgewerk raak. Net die werklike desperate swaai nog daai plakkate rond, die wat sowaar geen ander voertuig tot watookal hulle wil bereik kan vind nie.

Die gewenste en beste sosiale orde is werklik iets wat die heiden nie verstaan nie, die meeste van hulle het nog nooit die Bybel gelees nie, die klein getalletjie wat dit wel gedoen het, verstaan nie eens die eerste sin van die Bybel nie.

Gramsci was ‘n Italiaanse Marxis wat die “issue“ mooi saamgevat het, hy beduie dat homoseksualistiese huwelike alleen nie die orde sal afbreek nie, maar dat ‘n lang-termyn veldtog teen die kultuur van die gevestigde, ekonomies-veilige familie nodig is deur die invloed van die kerk te breek, die media oor te neem, die skole en universiteite te korrup en die fundament van alles, die familie, te verbrokkel. Dit kom so reg uit die instruksieboek van die eienaar van Gramsci se siel, Satan en dit is sentraal aan die “Sentrale Agenda”.

Die huidige sosiale elite is nie meer soos in die dae van Marx nie, of soos Stalin se “useful idiots” meer nie, of mede-reisigers op Mao se “long march” nie. Hulle is onder die invloed van ander hallusiante soos Politieke Korrektheid, Kritieke Teorie en Kulturele Relativisme. In die omvang van onheil is hulle egter steeds “Useful Idiots” in Satan se eie “Long March”

Die reaksie op my erkenning van die makou se eienskappe het die beskrywing weer uitgelig, daar was weer die gillende betogers met geen oplossing op hul plakkate nie. “Freedom of speech” sluit blykbaar “Freedom of garble” in.

Ek het nooit my reg om vir myself te dink opgegee nie en ek lees graag nugtere debatte oor al die dinge wat deel vorm van die wêreld se sentrale agenda. Ek minag meeste daarvan en dit is binne my reg. Baie is daardie reg ontneem, die vervolging van alle gelowe tel vinnig spoed op en die skending van hul “regte” is oral te sien. In die “Weste” word  Christelikheid toenemend afgekeur waar dit kom by werksaansoeke, bevorderings ens. Die G_dlose heiden is egter te bang om dieselfde aan die Moslem te doen. In lande met Islam-regerings, wel good luck as jy nie baie presies die rituele van denklose dinge volg nie, hulle weet alles van die Koran en niks van enigiets anders nie. Die arrogansie egter van Islam het daarin geslaag om die geloof wat bekend is vir “peace”, Boeddhisme tot geweld te dryf, veral in Asië. Na my mening vorm dit deel van die Sentrale Agenda wat mik na een regering en een geloof wat die doel dien van die huidige heerser van hierdie planet, Satan.

Die “debat” oor veral evolusie is amper uitsluitlik tussen mense wat niks van wetenskap weet nie en klein bietjie van die Bybel aan die een kant en aan die ander kant weer een wat bietjie van wetenskap weet en niks van die Bybel nie. Hoe kan ek so ‘n borrelbytery nie minag nie? Perdebytjie het ‘n plakkaat rondgeswaai met iets oor lees ‘n boek op, maar sy het nie ‘n boek om aan te beveel nie.  Perdebytjie, los liewer die Primêre Skool biologie pamfletjies en lees die boeke van mense soos Gerald L Schroeder. Van sy idees is goed.

So is daar legio idees wat veronderstel is om deur almal verdra te word onder die vaandel van Multikulturele Demokrasie. Die feit is egter dat daar weinig harmonie en baie konflik tussen hierdie idees is. Die Sentrale Agenda het baie metodes om dit wat tot voordeel van die agenda is te bevorder en die ander uit te wis. Veral die ongewenste feite kry aandag, meestal word daardie idees as belaglik voorgehou terwyl daar wyd getrap word om die waarheid te vermy. En die spulletjie wat vergeet het hoe om te dink spot saam en klop mekaar op die skouer in self-verwondering.

Een van ons heilige waardes is dat ‘n man onskuldig is totdat hy skuldig bewys is. Na bewering, maar wat gaan werklik aan? Die dinge wat kritiek is vir die Sentrale Agenda en onbewysbaar is of walglik is, word beskerm. Elke keer wat ‘n hof oor een van hierdie dinge sit, wen die Sentrale Agenda. Soms verloor hy die saak, maar deel van die “Long March” is om die wette te verander. Die VVO is ‘n uitstekende voorbeeld, hierdie belaglike organisasie het nog nooit op enige plek enigiets bereik wat hulle ‘n sukses kan noem nie. Hulle eis Namibia as ‘n sukses en miljoene glo dit, behalwe die van ons wat daar was en weet dat dit ‘n Duitse sukses was, desondanks die ongelooflike inkompetensie van die VVO. Die belangrike ding is om te sien hoe internasionale wette stukkie vir stukkie herskryf word in die rigting van ‘n omvattende  mandaat vir hierdie VVO.

Wat die huidige buzz van die elite, evolusie betref, dis ‘n teorie wat ‘n doel het. Dit is nie bewys nie, die “Big Bang” is net dit, ‘n moerse lawaai. So hoe dwing jy hierdie twak af? Die voorbereiding is lankal begin deur die leer van Bybel in skole uit te gooi.  Dis maklik, skole wat Bybelstudie aanbied kry nie geld by die regering nie. So, die dollar weeg meer as G_d en G_d is uit. Volgende stap, evolusie is in en daarvoor betaal die regering. Maar steeds kan evolusie nie wetenskaplik bewys word nie, en hier is waar dit werklik duidelik behoort te word vir almal wat nog klou aan hul reg om vir hulself te dink. Die “burden of proof” word verskuif van die een wat die bewerings maak na die een wat die bewerings verwerp. Die G_dlose sê dat evolusie moet aanbid word of verkeerd bewys word, en die G_dlose wêreld diskwalifiseer die Bybel as bewys. Natuurlik sonder om die Bybel verkeerd te bewys. Jy daar Oom Daan?

Ras  het te doen met iets wat inherent aan die person is, hy is so gebore en sy eie voorkeur of afkeur het geen effek op daardie feit nie. Ras-verwante wette kan dit akkommodeer. Ander dinge egter, soos geloof, sportondersteuning, politieke oortuiging, hulpverlening, misdaad en homoseksualiteit is egter bewustelike keuses wat hy maak. Een van die klein deeltjies van die Sentrale Agenda is om hierdie werklikheid te vervaag, meer en meer dink die ondinkindes dat hulle niks daaraan kan doen nie. So word bewustelike swak keuses beskerm en aangemoedig en onheil word gevestig.

Maar nou ja. Hier stap nou ‘n ou verby my huis en doer ander kant vlieg ‘n makou dam toe. Die ou stap want hy kan nie vlieg nie. Op TV is ‘n fliek oor ouens wat opgehou het om vir hulself te dink. Die fliek se titel is iets oor zombies.

Ek groet in vrede

Duitswester