Versugting

  • 1

Hoe kan ek vra dat jy na my moet kom
as die woorde wat in my opwel
van ander vrouedigters is
wat hul verlange na die geliefde
welluidend kon verwoord in eie taal?

Of sal Christina Rossetti en Emily Dickinson
nuut en anders klink in Afrikaans?
Christina het geskryf:
“Kom na my in die stilte van die nag,
kom na my in die sprekende stilte van ’n droom”
en Emily het gesê as hy in die herfs sou kom,
sy van die somer sou korte mette maak
soos in weersin en plesier ’n huisvrou
met één slag ’n treiterende vlieg.

As jy wanneer jy jonk is, op die geliefde wag,
moet jy die tyd se trae gang verduur
as die son in glans en glorie
van oos na wes sy ligbaan strek.
En as wanneer jy oud is,
die korter dae se ligure jou ontglip,
moet jy die versugting behou
en as dit die geliefde nog nie na jou ontbied,
is die koms van die muse verseker
en deur woorde jou soet versadiging
in die aansyn van ’n nuwe lied.

 

Lees al die Mondig-gedigte hier:

Mondig

 

 

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top