Verjaarsdagliedjie
ek onthou jou, son-kind
hoogty in die park
– die brander het amper omgeslaan! –
en jy het grootgeword, virtuele kind
kyk, duskant die remote en mouse pad
en fosforletters op jou rekenaarskerm
brand ’n ánder somer:
as dit reën, was die sipresse
hulle stofjasse skoon
Ladybirds vlieg rond
met kolletjies beloftes
en ’n vlinder knip sy vlerke blou-oog
virtuele dogtertjie,
jy wat hoogsomer verjaar
kyk rond, skoonheid is orals:
ek maak my potlood skerp
en die saagsel wat uit die skerpmaker krul
is óók ’n vlindervlerk
ek is maar ’n outydse skrywer
en die tegnologie verander te vinnig
maar ek weet Watermeyer het gesê
as jy in ’n kind se oë kyk
dan sien jy God –
ook jý wat nou hier luister
 |
 |
 |