U eie keuse
1949 en Pa is weg
ek’s vyf en Ma stuur my na die poskantoor
maar die koevert is nie daar
en ek sê die onderhoud is laat
Ma sug; gee musiekles tot nege-uur saans
Boetie is nou die man in die huis
hy stook vuur vir die smeulstoof
en ek maak die kos
maar Saterdagaand is U eie keuse
net ons drie op Ma se bed
die bedlampie brand flou en ons luister
“Die blou Donau”, “Die slawekoor” en Fritz Kreizler
dis Fritz Wunderlich en “Rustle of spring”
en Ma huil met “Saggies ontwaak my hart”
dan raak ek bang want Pa is méér as net weg
en Boetie kyk op sy oë styf en blink
nou’s U eie keuse al ses-en-sestig
en die oudste program in Afrikaans
want ’n radio speel vir eensame mense
want ’n radio speel vir deursigtige mense
die radar van oudword span kleiner –
geslagte al speel ons dieselfde plate
want dis U eie keuse
en die verlange na my ma word meer
soms verbeel ek my ek sien haar
verglans in ’n goue stilte voor haar klavier
en sy luister na die eter
maar sy is weg en hemel is ook eter
dan speel die radio agtuur Saterdagaand
en nostalgies skuif ek nader
want ’n radio speel vir eensame mense
want ’n radio speel vir deursigtige mense
 |
 |
 |