Litnet

Daar is ’n interessante Bybelse skrifgedeelte wat verklaar dat wanneer die evangelie verkondig is tot aan die uithoeke van die aarde, sal die groot en deurlugtige dag van God aanbreek. So asof die Hemelse Vader eers wil seker maak dat almal wel ’n kans en geleentheid ontvang ...

’n Paar jaar gelede het hierdie stelling vir my onmoontlik gelyk. Hoe kry jy die ‘goeie nuus’ verkondig tot aan die uiterste plekke? As ek dink aan die arm behoeftiges, soos Maria, wat agter die berg woon en geen elektrisiteit of moderne tegnologie besit. Sekerlik sou dit nie plaasvind in mý generasie? Ek meen, my ouers het nog in die tyd geleef waar skrifgedeeltes in bottels verseël, geseën en in die see gegooi is, hopende dat seestrome die goeie nuus na afgeleë plekke sou uitspoel.

Vandag besef ek dat die tegnologiese kuberskokgolf ons in SA ook getref het. God se tydsberekening is volmaak. Gisteraand nog het ons ernstig om ’n tafel vergader en die leë sitplekke van die jeug in die kerk bespreek. Ons bekommernis dat daar nie genoeg jongmense in die kerk inbeweeg vir die volgende generasie. Ek was verniet bekommerd, het nie die tekens van verandering voor oog dopgehou. Daar is ’n goeie rede waarom die stroom opdroog, en die kerk sal daarby moet aanpas. Of hulle dit wil weet of nie. Want ons leef nie meer in Elvis Presley se tyd nie.

Noem dit kubersending of kuber-kerk. ’n Ongelooflike potensiaal tot evangelisasie. Dit is NOU dié tydvak van redding tot aan die uithoeke van die aarde. Enige nasie is bereikbaar. Slegs ’n ‘sein’ vêr. Skielik verloor die effektiwiteit van blokking teen radiostasies wat die goeie nuus wil uitdra sy krag. Konfiskering van bybels by grense of uitmoor van christene sal iets van die verlede wees. Die internet breek alles oop en plaas dit binne in Maria se hand – sonder elektrisiteit en in haar eie taal!

Die kerke in SA sit egter met mense wat huidiglik nog onkundig omtrent kubersending is. Die kerk sal moet wakker skrik en besef dat sy mense wat die ekonomie voltyds dien, ook aangewend kan word tot kuberevangelisasie en uitreiking.

Dr Bruce Wilkinson, bekende skrywer van die boek: Die gebed van Jabes, is van die eerste om hierdie geleentheid in SA raak te sien. Dit is die begin van ’n wêreldwye opleidingsrewolusie op meer as 1000 kampusse in 7 lande. Die afskopsending begin 11-14 September 2013. Dit word genoem die TEN bekendstelling (Teach Every Nation) en is die strategie ’n kombinasie van satelliet uitsendings na honderde kerkkampusse, gevolg deur duisende massa- en groepopleidingsessies, weeklange persoon-tot-persoon opleidingsgeleenthede op kampus en volgehoue aanlyn kursusse. En ek vergroot nie. Onder leiding van Dr Bruce Wilkinson, gerespekteerde skrywer en leraar, word predikante, leiers en leraars opgelei en bemagtig om alles te wees en te doen waarvoor God hulle bestem het.

Teen einde Junie 2013 het alreeds 500 kampusse in SA geregistreer en dit staan onder leiding van Dr Reuben van Rensburg, hoof van SA Theological Seminary.

Daar word gekyk na geheime omtrent eksponensiële groei, ’n geloofspad wat veel meer as blote etiek is en beslis nie ’n self-help spirituele reis is nie, eerder ’n ontdekkingsreis van metodes wat jou meer professioneel en geestelik sal toerus om onderrig te gee in Gods Woord.

Hierdie sal ’n ongelooflike geleentheid wees om ons land te help verander deur waardes- en vaardigheidsopleiding. Die kursusse is spesiaal ontwikkel vir SA se predikers en leiers oor onderwerpe wat huidiglik saakmaak wat tans bitter nodig is vir alle Afrikaleiers oor kleurgrense heen.

Daar is ’n momentum, ’n nuwe golf. TEN se visie is strategies, tydig en relasioneel in sy metodologie. Want daar is ’n groot behoefte na ’n Bybelse wêreldbeskouing en transformasie om kerke, bedienings en die geestesingesteldheid van nasies in Afrika lande binne te dring.

Kerke of groepe kan registreer as ’n TEN koppeluitsendingskampus by www.teacheverynation.org

Nagmaal op Skype of Sondagskool op internet deur aanlynkommunikasie is hier! Binne jou huis net ’n skerm vêr. Die nuwe inding is Internasionale huiskerke. Ds du Toit, leraar van Helderbaai vertel dat hy reeds twee huiskerke so gestig het vanuit alle denominasies. Daar word waardes gestel, soos:

1. Dit moet direkte uitsendings wees
2. Dit moet in Afrikaans wees
3. Dit moet in ’n gebied wees waar bogenoemde waardes nie reeds van toepassing is.

Kuber-evangelisasie kan voorwaar gesien word as God se volmaakte tydsberekening. Die tyd is ryp daarvoor.

Mag jou dag geseënd wees.

Trienie Mahne