Foto: Canva
Te veel
Ek sien te veel pa’s agterop Hyundai-bakkies
met leë skaftiens in plastieksakkies
stewelspore regoor die land
’n empty Black Label in elke hand
Ek sien te veel meisies voori clinic
in skool skirts sonder matriek
blesser bybies op elke heup
elke Krismis rooi deurstreep
Ek sien te veel seuns inni sjebeen
verdwaalde oë vol amfetamien
vinnige vuiste en lem teen wang
nou sit hulle saam – twaalf jaar mang
Ek sien te veel ma’s met gate vir tande
krom kapot knypers in plaas van hande
in ander se huise arbei hulle sat
leë kykers – leë hande – hart en kop plat