Litnet

Foto: Pixabay.com

Tafelberg

in spierwit kleed staan die tafel gedek
daar waar branders aan sy pote lek
en witskuimwater oor sandkastele speel
wyl Liza haar melodieë met die wêreld deel

sit Van Hunks en die duiwel diep in gesprek
en ek sien hoe die hemel se poorte rek
want borrels wit skuim versamel teen die blou
en heg aan die kleed wat oor Tafelberg vou

dan rol die mis oor die Kaap se kus
en die son se strale word in wolke geblus
want Van Hunks en die duiwel sit weer en stook
terwyl die Suidooster fluit deur die grou bolle rook