Foto: Canva
Stokkiesdraai
vanmôre moes ek kies
tussen jou preek
en Bob Dylan s’n –
ek hoop jy verstaan
my keuse
die liturgie
was vreemd maar wonderlik
die begeleiding onverbeterlik
die eksegese eenvoudig
vormloos-heilig
sy boodskap weerklink helder
tot aan die uithoeke van die wêreld
en tog bly dit naby my soos ’n seën
selfs al wonder ek steeds daaroor
buitendien is ek uitgevang
soos ’n skoolkind wat skelm
saam met vriende rook
ek hoop jy verstaan
ek wéét jy verstaan
Kommentaar
Eenvoudig puik.