| Tydens die US Woordfees het die Sanlam/LitNet-poësieslypskool op 7 Maart 2015 by die Protea Hotel in die Tegnopark-kompleks buite Stellenbosch plaasgevind. Een van die deelnemers aan die werkswinkel, Antonie Döckel, het 'n gedig omtrent die geleentheid geskryf en deel dit met LitNet. |
Slypskool
Versmaak leer jy by ’n slypskool
elkeen na sy aard:
Party wil vers-tel en op versvoete let
ander is weer lief vir vers-preek.
Sommige reëls moet jy vroeg
afkap
en ander word sommer weggeslyp
laat die leser dit vers-kaf
Terwyl ons leer van metafore
en om abstraksies te vermy
wonder ons of ons slypers
glo dat ons skerp kan word
of bloot slypstene bly